Cənubi Koreya hökuməti Google şirkətinin Google Maps və Google Earth platformalarından ölkə ərazisinə aid enlik və uzunluq koordinatlarını sildiyini açıqlayıb. Bu addım şirkətə yüksək dəqiqlikli xəritə məlumatlarını xaricə ötürmək üçün fevral ayında verilmiş icazənin təhlükəsizlik şərtlərindən biridir.
QHT.az xarici mediaya istinadən bildirir ki, Cənubi Koreya təxminən 20 il ərzində Google-un bu məlumatları əldə etmək və ixrac etmək müraciətlərini rədd edib. Buna səbəb hərbi və təhlükəsizlik obyektləri haqqında həssas məlumatların ictimaiyyətə açıqlanması riski olub. Bu müraciətlər 2007 və 2016-cı illərdə də qəbul edilməyib.
Hökumətin açıqlamasına görə, ölkə ərazisindəki hərbi və təhlükəsizlik obyektlərinin daxilində və ətrafında çəkilmiş Google Street View görüntüləri də silinəcək. Təhlükəsizlik şərtlərinin ciddi şəkildə pozulacağı təqdirdə şirkətə verilmiş icazə dayandırıla və ya ləğv edilə bilər.
Məlumata görə, Google yerli xəritə məlumatlarının emalı üçün Cənubi Koreyanın TMAP Mobility şirkəti ilə əməkdaşlıq edəcək. Məlumatlar ölkə daxilindəki serverlərdə dövlətin təhlükəsizlik standartlarına uyğun hazırlanacaq və dəyişdirilmədən istifadə ediləcək.
Əməkdaşlıq yalnız yollar, binalar və ünvanlar kimi statik xəritə məlumatlarını əhatə edəcək. İstifadəçilərin şəxsi məlumatları, real vaxt rejimində yerləşmə məlumatları və hərəkət marşrutları bu prosesə daxil edilməyəcək. Google-un emal edilmiş məlumatlardan gələn ildən etibarən istifadə etməsi gözlənilir.
