Yaponiyada aparılan araşdırma gündə təxminən 180 qram süd qəbulunun insult riskinin azalması ilə əlaqəli ola biləcəyini üzə çıxarıb. Tədqiqatçıların modelləşdirməsinə görə, süd istehlakının artırılması ölkədə 10 il ərzində 123 mindən çox insult hadisəsinin qarşısını ala bilər.
QHT.az xarici mediaya istinadən bildirir ki, Nutrients jurnalında dərc olunan araşdırmada 30-79 yaş arası yetkin insanların süd istehlakı ilə insult riski arasındakı əlaqə öyrənilib.
Tədqiqatçılar gündəlik 180 qram süd qəbulunu – təxminən bir stəkan südü – əsas götürərək bunun əhali səviyyəsində mümkün təsirlərini modelləşdiriblər. Hesablamalara əsasən, süd istehlakının bu səviyyəyə çatdırılması 10 il ərzində ümumi insult riskini təxminən 7 faiz azalda bilər. Bəzi qruplarda isə bu göstəricinin 10,6 faizə qədər yüksələcəyi ehtimal olunur.
Araşdırmada süd istehlakının hazırkı səviyyəsi qorunacağı təqdirdə, Yaponiyada növbəti 10 il ərzində təxminən 1,76 milyon insult hadisəsinin baş verə biləcəyi, bunlardan 267 mindən çoxunun ölümlə nəticələnə biləcəyi hesablanıb. Süd qəbulunun artırılması ssenarisində isə 123 618 insult hadisəsinin və 18 721 ölümün qarşısının alına biləcəyi proqnozlaşdırılıb.
Tədqiqatçılar südün tərkibindəki kalsium, kalium və maqnezium kimi mineralların mümkün faydalarına diqqət çəkiblər. Bu maddələr qan təzyiqinin tənzimlənməsində, damarların rahatlamasında və qan dövranının yaxşılaşmasında rol oynayır.
Araşdırma müəllifləri südün insult riski ilə əlaqəli bir sıra mikroelementlərlə zəngin qida olduğunu vurğulayıblar. Onların sözlərinə görə, kalsiumun yüksək qəbulu hipertoniya və insult riskinin aşağı olması ilə əlaqələndirilir. Südün tərkibindəki kalium və maqnezium da insult riskinin azalması ilə bağlıdır.
Bununla belə, tədqiqat zamanı real insanların süd istehlakı artırılaraq izlənilməyib. Nəticələr Yaponiya əhalisinin statistik göstəriciləri, insult və ölüm halları, səhiyyə xərcləri, eləcə də süd istehlakı ilə insult riski arasındakı əvvəlki araşdırmalar əsasında qurulan 10 illik simulyasiya modelinə əsaslanır.
Qeyd edək ki, araşdırma süd istehlakının artırılması ilə insult riskinin azalması arasında mümkün əlaqəni göstərir, lakin gündə bir stəkan süd içməyin hər kəsdə insultun qarşısını alacağı anlamına gəlmir.
