Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə 5–6 noyabr 2026-cı il tarixlərində Gəncə şəhərində keçirilən QHT-lərin IV Əməkdaşlıq Forumunu ölkəmizdə vətəndaş cəmiyyəti institutlarının inkişafı, dövlət-QHT münasibətlərinin möhkəmləndirilməsi və ictimai iştirakçılığın genişləndirilməsi baxımından əhəmiyyətli platforma kimi qiymətləndirirəm.
Bu fikirləri QHT.az-a açıqlamasında “Qeyd-Sosial Maarifləndirmə” İctimai Birliyinin baş katibi Aysel Tahirova bildirib.
“Forumun əhəmiyyəti yalnız müzakirə olunan məsələlər və irəli sürülən təşəbbüslərlə məhdudlaşmır. Bu tədbir həm də Azərbaycanda qeyri-hökumət sektorunun mövcud inkişaf dinamikasını, institusional potensialını və gələcək fəaliyyət istiqamətlərini dəyərləndirmək baxımından mühüm imkan yaratdı.
Forumun məhz Gəncə şəhərində və 8 Noyabr- Zəfər Günü ərəfəsində təşkil olunması xüsusi tarixi və mənəvi məna daşıyırdı. Vətən müharibəsi dövründə Ermənistanın raket hücumlarına məruz qalmış, ağır itkilər yaşamış Gəncə xalqımızın milli iradəsinin, mənəvi dözümlülüyünün və həmrəyliyinin rəmzlərindən biridir. Belə bir şəhərdə ölkənin müxtəlif bölgələrini təmsil edən vətəndaş cəmiyyəti nümayəndələrinin bir araya gəlməsi milli birlik və dövlətçilik dəyərləri baxımından xüsusi əhəmiyyət kəsb edirdi.
Hesab edirəm ki, müasir dövrdə qeyri-hökumət təşkilatlarının fəaliyyətinə yalnız sosial layihələrin icrası prizmasından yanaşmaq kifayət deyil. QHT-lər ictimai maraqların ifadə olunmasında, sosial problemlərin müəyyənləşdirilməsində, vətəndaş təşəbbüslərinin təşviqində, ictimai nəzarətin həyata keçirilməsində və dövlətlə cəmiyyət arasında konstruktiv dialoqun formalaşdırılmasında mühüm institusional potensiala malikdir.
Azərbaycanda vətəndaş cəmiyyəti sektorunun inkişafına yönəlmiş dövlət siyasətinin ardıcıl şəkildə təkmilləşdirilməsini xüsusi qeyd etmək istərdim. Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən institusional islahatlar, müvafiq fərman və sərəncamlar, QHT-lərin fəaliyyətinin dəstəklənməsi istiqamətində qəbul edilən qərarlar sektorun inkişafı üçün yeni imkanlar formalaşdırır.
Xüsusilə qrant maliyyələşdirilməsi mexanizmlərinin təkmilləşdirilməsi, “Bir pəncərə” sisteminin tətbiqi, dövlət qurumları ilə qeyri-hökumət təşkilatları arasında əməkdaşlığın genişləndirilməsi və institusional dayanıqlılığın gücləndirilməsi istiqamətində atılan addımları müsbət qiymətləndirirəm. Fikrimcə, bu mexanizmlərin səmərəli tətbiqi QHT sektorunda şəffaflığın, peşəkarlığın, rəqabətqabiliyyətliliyin və nəticəyönümlü fəaliyyətin inkişafına mühüm töhfə verə bilər.
Eyni zamanda, düşünürəm ki, vətəndaş cəmiyyətinin inkişaf səviyyəsi yalnız fəaliyyət göstərən təşkilatların və ya həyata keçirilən layihələrin sayı ilə ölçülməməlidir. Əsas meyar həmin fəaliyyətlərin ictimai faydalılığı, sosial təsiri, davamlılığı və cəmiyyətin real ehtiyaclarına cavab verməsidir. Bu səbəbdən QHT-lərin institusional potensialının artırılması ilə yanaşı, onların strateji planlaşdırma, layihələrin idarə edilməsi, ictimai kommunikasiya və beynəlxalq əməkdaşlıq imkanlarının genişləndirilməsi də prioritet istiqamətlərdən olmalıdır.
Mövcud beynəlxalq münasibətlər sistemi və mürəkkəb geosiyasi proseslər fonunda vətəndaş cəmiyyəti institutlarının üzərinə düşən məsuliyyətin daha da artdığı qənaətindəyəm. Azərbaycanın milli maraqlarının beynəlxalq müstəvidə düzgün təqdim olunması, ölkəmiz haqqında obyektiv məlumatların yayılması, dezinformasiyaya qarşı maarifləndirmə fəaliyyətinin gücləndirilməsi, milli-mənəvi dəyərlərin qorunması və ictimai həmrəyliyin təşviqi bu baxımdan xüsusi aktuallıq daşıyır.
Mənim fikrimcə, güclü vətəndaş cəmiyyətinin əsas xüsusiyyətlərindən biri onun dövlətçilik maraqlarına həssas yanaşmaqla yanaşı, ictimai məsuliyyət, müstəqil təşəbbüskarlıq və konstruktiv əməkdaşlıq prinsiplərinə əsaslanmasıdır. Dövlət və vətəndaş cəmiyyəti arasında qarşılıqlı etimadın möhkəmləndirilməsi, ictimai dialoqun genişləndirilməsi və birgə fəaliyyət mexanizmlərinin inkişaf etdirilməsi ölkənin uzunmüddətli sosial və institusional tərəqqisi üçün vacib şərtlərdəndir.
Forum çərçivəsində QHT nümayəndələrinin Azərbaycan Respublikasının Prezidentinə ünvanladıqları müraciəti də vətəndaş cəmiyyətinin ölkənin strateji inkişaf prioritetlərinə münasibətinin ifadəsi baxımından əhəmiyyətli hesab edirəm. Bu mövqenin mahiyyətində dövlətçilik dəyərlərinə bağlılıq, milli maraqlar ətrafında həmrəylik və ölkənin gələcək inkişafına töhfə vermək məsuliyyəti dayanır.
Dövlət-QHT münasibətlərinin inkişafında növbəti mərhələ daha çox praktik əməkdaşlıq mexanizmlərinin formalaşdırılması ilə xarakterizə olunmalıdır. Xüsusilə regionlarda fəaliyyət göstərən təşkilatların potensialının gücləndirilməsi, dövlət qurumları ilə birgə sosial təşəbbüslərin genişləndirilməsi, ictimai iştirakçılığın təşviqi və QHT-lərin qərarların müzakirəsi proseslərinə daha fəal cəlb olunması mühüm əhəmiyyət daşıyır.
Gəncədə keçirilən IV Əməkdaşlıq Forumunun əsas dəyərini də məhz bu istiqamətdə görürəm. Müxtəlif sahələrdə fəaliyyət göstərən təşkilatların bir platformada təmsil olunması, mövcud çağırışların müzakirəsi, qarşılıqlı təcrübə mübadiləsi və yeni tərəfdaşlıq imkanlarının müəyyənləşdirilməsi sektorun gələcək inkişafı üçün əlverişli zəmin yaradır.
Əminəm ki, forumun real nəticələri qarşıdakı dövrdə irəli sürülən təşəbbüslərin konkret əməkdaşlıq proqramlarına, davamlı layihələrə və ölçülə bilən ictimai faydaya çevrilməsi ilə daha aydın görünəcəkdir.
Yekun olaraq vurğulamaq istərdim ki, güclü vətəndaş cəmiyyəti güclü dövlətin mühüm institusional dayaqlarından biridir. Dövlətin inkişaf strategiyası ilə cəmiyyətin təşəbbüskarlıq potensialının uzlaşdırılması, qarşılıqlı məsuliyyətə əsaslanan əməkdaşlıq mühitinin möhkəmləndirilməsi və ictimai institutların fəaliyyət imkanlarının genişləndirilməsi Azərbaycanın davamlı inkişafına xidmət edən əsas amillərdəndir.
Bu mənada, Gəncədə keçirilən QHT-lərin IV Əməkdaşlıq Forumunu sadəcə növbəti sektor tədbiri deyil, dövlət və vətəndaş cəmiyyəti arasında əməkdaşlığın keyfiyyətcə yeni məzmun qazanması istiqamətində əhəmiyyətli addım kimi dəyərləndirirəm.”
