Boğazın arxa hissəsində yaranan kiçik ağ və ya sarımtıl törəmələr əslində badamcıq daşları ola bilər. Əksər hallarda təhlükəli hesab edilməyən bu törəmələr ağız qoxusu, boğazda qıcıqlanma və narahatlıq yarada bilər.
QHT.az xarici mediaya istinadən bildirir ki, tibbdə tonzillolit adlandırılan badamcıq daşları qida qalıqlarının, seliyin və bakteriyaların badamcıqların kiçik oyuqlarında toplanaraq zamanla bərkiməsi nəticəsində yaranır.
Bu törəmələr adətən ağ və ya sarımtıl rəngdə, kiçik ölçülü olur. Bəzi insanlar onların mövcudluğundan xəbərsiz qalır, digərləri isə boğazda yad cisim hissi və narahatlıqla qarşılaşır.
Badamcıq daşlarının ən çox rast gəlinən əlamətlərindən biri ağız qoxusudur. Bununla yanaşı, boğazda qıcıqlanma, udqunma zamanı narahatlıq və davamlı öskürək hissi də yarana bilər.
Mütəxəssislər bildirirlər ki, badamcıq daşları əksər hallarda ciddi sağlamlıq problemi yaratmır. Bununla belə, təkrarlanan narahatlıq, ağrı və ya udqunma çətinliyi olduqda həkimə müraciət etmək tövsiyə edilir.
Ağız boşluğunun gigiyenasına diqqət yetirmək, dişləri mütəmadi fırçalamaq və kifayət qədər su qəbul etmək bu problemin yaranma ehtimalını azaltmağa kömək edə bilər.











