Böyük Britaniyada milyonlarla insanın qaraciyər xəstəlikləri ilə bağlı mütəmadi müayinəyə cəlb edilməsi təklif olunur. Buna səbəb xəstəliyin geniş yayılması və uzun müddət heç bir aşkar əlamət vermədən inkişaf edə bilməsidir.

QHT.az xarici mediaya istinadən bildirir ki, məlumatlara görə, ölkə əhalisinin təxminən hər beş nəfərindən birində qaraciyər xəstəliyinin ilkin mərhələləri mövcud ola bilər. Son on ildə isə bu xəstəliklə bağlı diaqnozların sayının beş dəfə artdığı bildirilir.

Britaniya Qastroenterologiya Cəmiyyəti 2-ci tip diabetlə yaşayan 4,6 milyon nəfərin mütəmadi qaraciyər müayinəsindən keçirilməsini tövsiyə edib. Artıq çəkisi olan və əlavə risk faktorlarından ən azı birinə malik şəxslərin də yoxlanılması təklif olunur.

Tövsiyəyə əsasən, müayinələrin hər beş ildən bir aparılması nəzərdə tutulur. Yüksək risk qrupuna daxil olan şəxslər isə qaraciyərdə çapıqlaşmanı, yəni fibrozlaşmanı aşkar edə bilən FibroScan müayinəsinə yönləndirilə bilərlər.

Mütəxəssislər bildirirlər ki, qaraciyər xəstəliklərinin yaranmasında artıq bədən yağları getdikcə daha böyük rol oynayır. Bu hallar yalnız alkoqol istifadəsi ilə əlaqəli deyil.

Hansı əlamətlərə diqqət yetirilməlidir?

Həkimlərin sözlərinə görə, xəstəlik uzun müddət gizli inkişaf edə bilər. Bəzi əlamətlər isə başqa sağlamlıq problemləri ilə qarışdırıla bilər.

Diqqət yetirilməli əsas əlamətlər bunlardır:

  • Davamlı yorğunluq və halsızlıq;
  • Diqqəti cəmləməkdə çətinlik;
  • Ürəkbulanma;
  • Gündəlik fəaliyyətlər zamanı özünü zəif hiss etmək.

Mütəxəssislər bu əlamətlərin müxtəlif səbəblərdən yarana biləcəyini vurğulayırlar. Buna görə də yalnız simptomlara əsasən diaqnoz qoymaq mümkün deyil.

Qeyd edək ki, qaraciyər xəstəliklərinin erkən aşkarlanması müalicənin vaxtında başlanması baxımından mühüm əhəmiyyət daşıyır. Şübhəli əlamətlər olduqda həkimə müraciət etmək tövsiyə olunur.