Son illər dünyada geniş yayılan arıqlama iynələri piylənmənin müalicəsində yeni imkanlar yaratsa da, onların nəzarətsiz istifadəsi sağlamlıq üçün risklər doğurur. Xüsusilə sosial şəbəkələrdə bu preparatlarla bağlı yayılan məlumatlar və estetik məqsədlə istifadəsi narahatlıq yaradır.

QHT.az xarici mediaya istinadən bildirir ki, son illərdə tibb dünyasının diqqət mərkəzində olan GLP-1 və GIP/GLP-1 tərkibli preparatlar piylənmənin müalicəsində mühüm yenilik hesab olunur. Əvvəlcə 2-ci tip diabetin müalicəsi üçün hazırlanan bu dərmanlar çəki azalmasına təsir göstərdiyinə görə geniş populyarlıq qazanıb.

Ümumdünya Səhiyyə Təşkilatının məlumatına görə, dünyada 1 milyarddan çox insan piylənmədən əziyyət çəkir. Yetkinlər arasında piylənmə 1990-cı ildən bəri iki dəfədən çox, uşaqlar və yeniyetmələr arasında isə dörd dəfə artıb.

Mütəxəssislər bildirirlər ki, semaqlutid və tirzepatid kimi preparatlar iştaha təsir edir, toxluq hissini artırır və mədənin boşalmasını ləngidir. Klinik araşdırmalarda bu dərmanların əhəmiyyətli çəki azalmasına səbəb olduğu müəyyən edilib.

Lakin onların istifadəsi risksiz deyil. Ən çox rast gəlinən yan təsirlər ürəkbulanma, qusma, ishal və qəbizlikdir. Bundan əlavə, sürətli çəki itkisi zamanı əzələ kütləsinin də azalması mümkündür.

Mütəxəssislər xəbərdarlıq edirlər ki, arıqlama iynələrinin sosial şəbəkələrdə populyarlaşması onların estetik məqsədlərlə və həkim nəzarəti olmadan istifadəsini artırır. Bu preparatlar hər kəs üçün uyğun deyil və yalnız tibbi göstəriş əsasında, mütəxəssis nəzarəti ilə istifadə olunmalıdır.