Birləşmiş Millətlər Təşkilatının İnkişaf Proqramı (UNDP) ölkələrə özəl investisiyaları cəlb etmək və yeni iş yerləri yaratmaq məqsədilə iki yeni təşəbbüs başladıb. Bu barədə 21 oktyabr 2026-cı ildə məlumat verilib.
QHT.az xarici mediaya istinadən bildirir ki, UNDP-nin rəhbəri Aleksandr De Kroo Dünya Bankının illik toplantıları çərçivəsində təşkilatın Dünya Bankı ilə əməkdaşlığı barədə danışıb. O bildirib ki, hər iki qurum ölkələrin iqtisadi inkişafını dəstəkləmək üçün bir-birini tamamlayan fəaliyyətlər həyata keçirir.
Hazırda bir çox ölkə enerji qiymətlərinin artması, inflyasiya, yaşayış xərclərinin və ərzaq qiymətlərinin yüksəlməsi kimi problemlərlə üzləşir. El Niño iqlim hadisəsinin təsirləri və maliyyələşmə xərclərinin artması da vəziyyəti çətinləşdirir.
De Kroonun sözlərinə görə, hökumətlər əhalini qiymət artımlarından qorumaq üçün müxtəlif tədbirlər görsələr də, bu, dövlət büdcələrinə ciddi yük yaradıb. Eyni zamanda, faiz dərəcələrinin yüksəlməsi borcların yenidən maliyyələşdirilməsini daha baha və çətin edib.
Yeni təşəbbüslərin əsas məqsədi ölkələrə özəl sektorun investisiyalarını cəlb etmək, iqtisadi imkanları genişləndirmək və məşğulluğu artırmaq üçün dəstək verməkdir.
