İsveçin paytaxtı Stokholmda dünyanın müxtəlif ölkələrindən minlərlə iştirakçının qatıldığı Dünya Su Həftəsi keçirilir. Forumda qlobal su ehtiyatlarının idarə olunması və su təhlükəsizliyi ilə bağlı problemlər müzakirə edilir.
QHT.az xarici mediaya istinadən bildirir ki, tədbirdə su ehtiyatlarının kənd təsərrüfatı, sənaye, dövlət və yerli icmalar arasında düzgün bölüşdürülməsinin vacibliyi vurğulanır. Qrup fəaliyyətlərindən birində yeraltı su ehtiyatlarının sürətlə azaldığı, kənd təsərrüfatı və sənayenin genişləndiyi yarımsəhra bölgəsində müxtəlif tərəflərin ehtiyaclarını balanslaşdırmaq tapşırılıb.
İştirakçılar fermer, hökumət nümayəndəsi, kommersiya istehsalçısı və investor kimi müxtəlif rolları canlandırıblar. Müzakirələr zamanı fərqli maraqlar arasında ciddi fikir ayrılıqları yaranıb.
Tədbirin əsas mesajlarından biri isə su təhlükəsizliyi ilə ərzaq təhlükəsizliyinin bir-birindən ayrılmaz olmasıdır. Su ehtiyatlarının azalması kənd təsərrüfatına, ərzaq istehsalına və ümumilikdə iqtisadi inkişafa birbaşa təsir göstərir.
