Özbəkistan Respublikası Ali Məclisinin Qanunvericilik Palatası sədrinin birinci müavini Akmal Saidovun başçılıq etdiyi nümayəndə heyəti Azərbaycan Dövlət İqtisad Universitetində olub.
QHT.az xəbər verir ki, UNEC rektoru professor Ədalət Muradov və müvafiq struktur rəhbərlərinin iştirakı ilə keçirilən görüşdə ali təhsil, dayanıqlı inkişaf və yaşıl iqtisadiyyatla bağlı müzakirələr aparılıb. Birgə konfransların təşkili, yaşıl iqtisadiyyat və dayanıqlı inkişaf sahəsində tədqiqatların aparılması barədə ilkin razılıq əldə edilib.
Prof. Ədalət Muradov Rəqəmsal UNEC-in, Nizami Gəncəvi adına Dayanıqlı İnkişaf və Yaşıl İqtisadiyyat Mərkəzinin fəaliyyəti barədə özbəkistanlı nümayəndə heyətinə ətraflı məlumat verib. Palata sədrinin birinci müavini Akmal Saidov UNEC-in elektron universitet modelini yüksək qiymətləndirərək, bu təcrübənin Özbəkistan ali təhsil müəssisələrində tətbiqinin zəruriliyini vurğulayıb.
Sonda UNEC-in yaşıl iqtisadiyyatla bağlı ingilis dilində çap etdirdiyi “Exploring The Green Economy: ISSUES, Challenges and Benefits” kitabı Akmal Saidova hədiyyə olunub.
