Alimlər Alzheimer xəstəliyinin erkən diaqnostikası üçün ümidverici nəticələr göstərən yeni RNT (ribonuklein turşusu) əsaslı qan testi hazırlayıblar. Araşdırmanın nəticələri Nature Communications jurnalında dərc olunub.
QHT.az xarici mediaya istinadən bildirir ki, tədqiqat zamanı alimlər beynin qan dövranına ötürdüyü molekulyar məlumatları daşıyan çox kiçik hissəcikləri araşdırıblar. Onlar Alzheimer xəstəliyi ilə əlaqəli xüsusi RNT biomarkerləri müəyyən ediblər. Xüsusilə SECmere adlandırılan yeni təsvir edilmiş nanohissəciyin beyindən gələn siqnalları daha güclü daşıdığı aşkarlanıb.
Mütəxəssislərin fikrincə, bu RNT biomarkerləri xəstəliklə bağlı dəyişiklikləri hazırda istifadə olunan zülal əsaslı qan testlərindən daha erkən mərhələdə aşkar edə bilər.
Hazırda Alzheimer diaqnozu çox vaxt bahalı beyin görüntüləmə müayinələri və ya onurğa beyni mayesinin götürülməsi (lumbal punksiya) kimi invaziv üsullarla qoyulur. Yeni qan testi isə diaqnostikanı daha sadə, rahat və əlçatan edə bilər.
Bununla belə, tədqiqatçılar bildirirlər ki, nəticələr ümidverici olsa da, testin klinik praktikada istifadəyə verilməsi üçün daha genişmiqyaslı klinik araşdırmalara ehtiyac var.
Alzheimer xəstəliyi demensiyanın ən geniş yayılmış formasıdır. Hazırda dünyada 55 milyondan çox insan bu xəstəliklə yaşayır və proqnozlara görə, 2050-ci ilə qədər bu rəqəm 150 milyonu ötəcək. Erkən diaqnoz xəstəliyin geri dönməz beyin zədələnməsi və ciddi idrak pozğunluqları yaranmazdan əvvəl müəyyən edilməsinə imkan yarada bilər.
