Araşdırmalar göstərir ki, gün batımını və ya günəşin doğuşunu izləmək təkcə estetik zövq vermir, həm də beyin fəaliyyətinə və psixi sağlamlığa müsbət təsir göstərir. Mütəxəssislərin fikrincə, bu təbii mənzərələr narahatlıq və depressiya əlamətlərini azalda, yaddaşı, yaradıcılığı, yuxu keyfiyyətini və hətta insanlarda altruizm hissini gücləndirə bilər.
QHT.az xarici mediaya istinadən bildirir ki, ABŞ-nin Massaçusets ştatındakı Keyp-Kod bölgəsində müşahidə edilən gün batımı xüsusi “qızılı saat” işığı ilə tanınır. Günəş üfüqə yaxınlaşdıqda havadakı rütubət işığı səpələyərək narıncı, qızılı və çəhrayı çalarların dənizlə qovuşduğu təsirli mənzərə yaradır.
Mütəxəssislər bildirirlər ki, gün batımının yaratdığı əsas faydalardan biri insanlarda heyranlıq (awe) hissi oyatmasıdır. Bu hiss insanın öz problemlərini daha kiçik və əhəmiyyətsiz görməsinə kömək edir.
ABŞ-dəki Arizona Dövlət Universitetinin sosial psixologiya professoru Mişel Şiota deyir ki, heyranlıq hissi insanın diqqətini gündəlik narahatlıqlardan uzaqlaşdıraraq onu indiki ana qaytarır. Bu isə mənfi düşüncə dövrlərini qırmağa, stressi azaltmağa və emosional vəziyyəti yaxşılaşdırmağa kömək edir.
Araşdırmalara görə, gün batımını izləmək beynin sakitləşməsinə, emosional tarazlığın qorunmasına və ümumi psixoloji rifahın yaxşılaşmasına töhfə verə bilər.
