Fərqanə Sülh Forumunda “Sülh və transsərhəd təşəbbüslər haqqında mülahizələr – Fərqanə vadisi icmalarının səsi” mövzusunda xüsusi sessiya keçirilib.
QHT.az xəbər verir ki, tədbirdə yerli qeyri-hökumət təşkilatları Fərqanə vadisində sülh mədəniyyətinin formalaşdırılması, Qırğızıstan, Tacikistan və Özbəkistan arasındakı uğurlu əməkdaşlıq təcrübəsi, həmçinin layihələr nəticəsində yerli icmalarda baş verən müsbət dəyişiklikləri müzakirə ediblər.
Sessiyada Özbəkistan Qeyri-hökumət Qurumları Milli Assosiasiyası Şurasının sədri Kamoliddin İşanxocayev “Fərqanə vadisi: qrant layihələri və qeyri-hökumət təşkilatlarının regional əməkdaşlığın inkişafındakı rolu” mövzusunda məruzə ilə çıxış edib.
O, çıxışında qeyd edib ki, Fərqanə vadisi vahid tarixi və mədəni bölgədir, burada xalqlar ümumi ənənə və maraqlarla birləşirlər, lakin su, torpaq və sərhədlərlə bağlı ortaq problemlər mövcuddur. Eyni zamanda, beynəlxalq qrantlar çərçivəsində həyata keçirilən QHT layihələrinin əhali arasında etimad, dialoq və əməkdaşlığı möhkəmləndirmək baxımından mühüm əhəmiyyət kəsb etdiyini vurğulayıb. O, su ehtiyatlarının birgə idarə olunması, turizmin inkişafı və gənclərin dəstəklənməsinə yönəlmiş təşəbbüsləri xüsusi qeyd edib.
Avropa İttifaqı, BMT və YUNESKO proqramları çərçivəsində həyata keçirilən uğurlu layihələr nümunəsində “aşağıdan yuxarıya” istiqamətlənmiş təşəbbüslərin bölgədə sülh və dayanıqlı inkişafı möhkəmləndirdiyi vurğulanıb.
Məruzəsinin sonunda o, fəal QHT-lərin uzunmüddətli dəstəklənməsi, təcrübə və resurs mübadiləsini təmin edən vahid regional əməkdaşlıq şəbəkəsinin yaradılmasının vacibliyini qeyd edib.
