Gecə yatarkən otaqda çox işıq olması ürəyin quruluşu və fəaliyyəti ilə əlaqəli dəyişikliklərlə əlaqələndirilib. 11 mindən çox insanın məlumatlarının araşdırıldığı yeni tədqiqatda gecə işığına daha çox məruz qalmağın ürəyin bəzi hissələrində qalınlaşma və sərtləşmə ilə əlaqəli olduğu müəyyənləşdirilib.
QHT.az xarici mediaya istinadən bildirir ki, araşdırma nəticələrinə görə, gecə saatlarında parlaq işıq orqanizmin təbii bioloji ritminə təsir göstərə bilər. Bu dəyişikliklərin ürəyin daha çox işləməsinə və zamanla ürək funksiyasına mənfi təsir göstərə biləcək proseslərlə əlaqəli olduğu ehtimal edilir.
Mütəxəssislər yataq otağında işıq səviyyəsinin azaldılmasının yuxu və ümumi sağlamlıq baxımından faydalı ola biləcəyini bildirirlər. Xüsusilə televizor, güclü gecə lampası və digər işıq mənbələrinin yuxu zamanı mümkün qədər azaldılması tövsiyə olunur.
Bununla belə, alimlər araşdırmanın gecə işığının ürək xəstəliklərinə birbaşa səbəb olduğunu sübut etmədiyini vurğulayırlar. Nəticələr yalnız gecə işığına məruz qalma ilə ürəkdəki dəyişikliklər arasında əlaqəni göstərir və bu əlaqənin səbəblərini müəyyənləşdirmək üçün əlavə tədqiqatlara ehtiyac var.
Piranə Xasiyeva