BMT-nin Sənaye İnkişafı Təşkilatı (UNIDO) süni intellektin sənayedə təhlükəsiz və inklüziv tətbiqini təşviq etmək məqsədilə yeni beynəlxalq əməkdaşlıq təşəbbüslərini təqdim edib. Təşəbbüs Çinin Şanxay şəhərində keçirilən World Artificial Intelligence Conference (WAIC 2026) çərçivəsində elan olunub.
QHT.az xarici mediaya istinadən bildirir ki, UNIDO-nun yaydığı məlumata görə, yeni təşəbbüs hökumətlər, qeyri-hökumət təşkilatları, akademik qurumlar və özəl sektor arasında əməkdaşlığın gücləndirilməsini nəzərdə tutur. Layihənin əsas məqsədi süni intellekt texnologiyalarından sənayenin davamlı inkişafı, məhsuldarlığın artırılması və iqtisadi inklüzivliyin təmin edilməsi üçün istifadəni genişləndirməkdir.
Təşkilat bildirib ki, proqram çərçivəsində inkişaf etməkdə olan ölkələrdə rəqəmsal bacarıqların artırılması, innovasiya ekosisteminin dəstəklənməsi və etik süni intellekt həllərinin tətbiqinə xüsusi diqqət yetiriləcək.
UNIDO rəsmilərinin sözlərinə görə, qlobal əməkdaşlığın gücləndirilməsi süni intellektin faydalarının daha geniş auditoriyaya çatdırılmasına, texnologiyaya çıxış imkanlarının artırılmasına və dayanıqlı sənaye inkişafına töhfə verəcək.
Qeyd edək ki, UNIDO BMT sisteminə daxil olan ixtisaslaşmış təşkilatlardan biridir və dünyanın müxtəlif ölkələrində sənaye inkişafı, innovasiya və dayanıqlı iqtisadi artım istiqamətində layihələr həyata keçirir.
