Avropa İnvestisiya Bankı (EIB) Yunanıstanda həyati əhəmiyyət daşıyan xidmətlərin və kritik infrastrukturun dayanıqlığının artırılması məqsədilə yeni məsləhət və texniki dəstək proqramına başlayıb. Təşəbbüs ölkənin enerji və su sektorlarında daha davamlı investisiya layihələrinin hazırlanmasına yönəlib.
QHT.az xarici mediaya istinadən bildirir ki, məlumata görə, EIB Yunanıstan hökuməti ilə əməkdaşlıq çərçivəsində prioritet investisiya istiqamətlərinin müəyyənləşdirilməsi, layihələrin hazırlanması və maliyyələşdirmə mexanizmlərinin işlənib hazırlanmasına texniki dəstək göstərəcək. Proqram Avropa İttifaqının Kritik Obyektlərin Dayanıqlılığı (CER) çərçivəsinin məqsədlərinə uyğun həyata keçiriləcək.
İlkin mərhələdə fəaliyyət enerji və su təsərrüfatı sahələrini əhatə edəcək. Layihə çərçivəsində iqlim dəyişikliyi, təbii fəlakətlər və digər risklər fonunda mühüm xidmətlərin fasiləsiz fəaliyyətinin təmin olunması üçün investisiya planları hazırlanacaq. EIB mütəxəssisləri layihələrin prioritetləşdirilməsi və həyata keçirilməsi üzrə Yunanıstanın aidiyyəti dövlət qurumları ilə birgə çalışacaqlar.
Bankın rəhbərliyi bildirib ki, dayanıqlı infrastrukturun qurulması və əsas xidmətlərin qorunması həm iqtisadi sabitlik, həm də cəmiyyətin təhlükəsizliyi baxımından strateji əhəmiyyət daşıyır. Proqramın gələcəkdə digər sahələri də əhatə etməsi nəzərdə tutulur.
