Biznes kreditlərinin ümumi kredit portfelində üstünlük təşkil etməsi ilk baxışda ölkədə sahibkarlığın inkişafına dəstək kimi qiymətləndirilə bilər.

Lakin iqtisadçı-ekspert Aslan Əzimzadə QHT.az-a açıqlamasında bu məsələyə daha fərqli yanaşma sərgiləyib. Ekspert bildirib ki, biznes kreditlərinin portfeldə payının yüksək olması bu kreditlərin real sektora yönəldiyini və sahibkarlığın inkişafına birbaşa xidmət etdiyini göstərmir: "Əgər biz kreditlərin restrukturizasiyasına baxsaq, görərik ki, ən çox restrukturizasiya olunan kreditlər məhz biznes kreditləridir. Bu isə onu deməyə əsas verir ki, sahibkarlar götürdükləri kreditləri vaxtında qaytara bilmirlər."

Aslan Əzimzadənin fikrincə, əsas səbəblərdən biri verilən kreditlərin faiz dərəcəsinin yüksək olmasıdır. Müxtəlif iqtisadi sektorların fərqli rentabellik göstəricilərinə malik olduğunu vurğulayan ekspert qeyd edib ki, bütün sektorlar üçün eyni və yüksək faizli kredit təkliflərinin mövcudluğu onların inkişafını çətinləşdirir: "Faktiki olaraq stabil və yüksək faizli kreditlər təklif olunur. Bu da müəyyən sahələr üçün ciddi əngəllər yaradır."

Ekspert əlavə edib ki, biznes kreditlərinin faiz dərəcələrinin istehlak kreditlərinə nisbətən daha aşağı olması, onların əlverişli olması anlamına gəlmir: "Çünki verilən kreditlərin həcmi də kifayət qədər aşağıdır. Bu isə sahibkarlıq sektorunun inkişafı üçün əlavə maneələr yaradır."

Aslan Əzimzadə sahibkarlar üçün faiz dərəcələrinin artırılmasının xüsusilə uzunmüddətli perspektivdə biznes sektoruna ciddi təsir göstərə biləcəyini də vurğulayıb: "Əgər bu addım düşünülərək atılmazsa, sahibkarların maliyyə yükü artacaq və bu da onların fəaliyyətini sarsıda bilər."

Pərvanə Fərhadqızı

QHT.az