Kredit portfeli artıb: QHT sədri əhalinin borclanma səbəblərini izah edir
İqtisadi və Sosial Araşdırmalara Yardım İctimai Birliyinin sədri, iqtisadçı-ekspert Eyyub Kərimli QHT.az-a açıqlamasında bildirib ki, bu ilin əvvəlindən etibarən ölkədə kredit portfelinin həcmi təxminən 6 milyon manat artıb. Onun sözlərinə görə, bu artım bir neçə mühüm amillərlə bağlıdır.
"Əgər ötən ilin müvafiq dövrü ilə müqayisə etsək, hazırda kredit portfeli 6 milyon manata yaxın artmışdır. Bu isə əhalinin borclanma meylinin yüksəldiyini göstərir. Əhalinin gəlirləri sabit qalsa da, inflyasiya təsirləri, artan tələbat və qiymət səviyyələri borclanmanı stimullaşdırır", – deyə ekspert qeyd edib.
Eyyub Kərimli vurğulayıb ki, kredit portfelinin artması eyni zamanda iqtisadi fəallığın genişlənməsi ilə də əlaqəlidir: "Kreditə olan tələb həm də iqtisadiyyatın fəallaşmasına təkan verir. Bu tələb bazarda hərəkətlilik yaradır və istehsalçıların təklifi ona uyğunlaşdırması nəticəsində iqtisadi aktivlik artır."
QHT sədri əlavə edib ki, bu proseslər iqtisadiyyatın genişlənməsi baxımından müsbət qiymətləndirilə bilər. Lakin əhalinin gəlirlərinin inflyasiya qarşısında sabit qalması, onların real alıcılıq qabiliyyətinə mənfi təsir göstərə bilər.
Pərvanə Fərhadqızı