Bu gün qəhrəman şəhidimiz Xəqani Əliyevin anım günüdür
Azərbaycan Silahlı Qüvvələrinin giziri olan Xəqani Əliyev 2020-ci ilin 27 sentyabrında başlanan Vətən müharibəsi zamanı Suqovuşanın azadlığı uğrunda gedən döyüşlərdə iştirak edib və 28 oktyabr tarixində bu istiqamətdə döyüş tapşırığını yerinə yetirərkən qəhrəmancasına şəhid olub.
QHT.az xəbər verir ki, o, 1990-cı il iyunun 12-də Yardımlı rayonunun Çanaqbulaq kəndində anadan olub. 2011-2013-cü illərdə müddətli həqiqi hərbi xidmətdə olub, 2015-ci ildən etibarən isə müddətdən artıq hərbi qulluqçu kimi xidmət etməyə başlayıb.
Xəqani Əliyev göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda" və "Suqovuşanın azad olunmasına görə" medalları ilə təltif edilib.
Ruhu şad olsun!