YouTube platformasında alkoqol, narkotik vasitələr, siqaret, qumar və erotik səhnələr əks etdirən videoların reklam kimi istifadəçilərə təqdim edilməsi ilə bağlı narazılıq yaranıb. Xüsusilə uşaqların və yeniyetmələrin bu cür məzmunlarla qarşılaşa bilməsi valideynlərin rəqəmsal platformalarda nəzarətin gücləndirilməsi çağırışlarına səbəb olub.
QHT.az xarici mediaya istinadən bildirir ki, Türkiyənin “Sabah” nəşrinin məlumatına görə, YouTube-da zərərli vərdişləri təşviq edən məzmunların reklam adı altında yayımlandığı iddia edilir. Məsələ müstəqil qurumların rəqəmsal platformalara nəzarəti və onların məsuliyyəti ilə bağlı müzakirələri yenidən gündəmə gətirib.
Nəşrin yazdığına görə, İngiltərədə BARB təşkilatının YouTube kanallarının televiziya ekranlarında izlənmə göstəricilərini ölçmək təşəbbüsünün məhkəmə qərarı ilə dayandırılması da müzakirələrə səbəb olub.
Məlumatda xüsusilə “Blackwater Holylight – Spades” adlı videoya diqqət çəkilir. Bildirilir ki, videoda qadın və kişilərin birlikdə narkotik vasitələrdən istifadə etdiyi, həmçinin qumar və siqaretlə bağlı davranışların nümayiş olunduğu görüntülər yer alıb. Nəşr bu məzmuna qarşı müvafiq filtr və məhdudiyyətlərin tətbiq edilməməsini tənqid edib.
Məsələ ilə bağlı valideynlər uşaqların və yeniyetmələrin qarşılaşa biləcəyi zərərli məzmunların qarşısının alınması üçün rəqəmsal platformalara nəzarətin artırılmasını və yeni tənzimləyici mexanizmlərin hazırlanmasını tələb ediblər.
Qeyd edək ki, təqdim olunan məlumatlar “Sabah” nəşrinin yaydığı iddialara əsaslanır. Konkret videonun reklam kimi hansı şərtlərlə yayımlandığı və platformanın həmin məzmunla bağlı mövqeyi təqdim olunan materialda əksini tapmayıb.










