Çinin yaddaş çipi istehsalçısı ChangXin Memory Technologies (CXMT) gələn həftə Şanxay birjasında səhmlərini satışa çıxaracaq. Şirkət IPO vasitəsilə 8,6 milyard ABŞ dolları cəlb edib və bu, Asiyada ilin ən böyük birja çıxışlarından biridir.
QHT.az xarici mediaya istinadən bildirir ki, CXMT 2016-cı ildə Hefey şəhərinin dövlət dəstəyi ilə cəmi 10 milyon yuan ilkin kapitalla yaradılıb. Hazırda şəhərlə əlaqəli investorlar şirkətin 36,8 faiz səhminə sahibdir və bu payın dəyəri təxminən 31,5 milyard ABŞ dollarına çatıb.
CXMT Çinin süni intellekt və yarımkeçirici sahəsində xarici texnologiyalardan asılılığını azaltmaq planında mühüm rol oynayır. Şirkət hazırda DRAM yaddaş çiplərinin istehsalında dünyanın dördüncü ən böyük istehsalçısıdır.
Mütəxəssislər bildirirlər ki, CXMT-nin uğuru Çində dövlət investisiyalarının yüksək texnologiya sahəsində böyük nəticələr verə biləcəyini göstərir. Bununla yanaşı, onlar qeyd edirlər ki, bu cür layihələr iqtisadi artımı sürətləndirsə də, əhalinin gəlirlərinin və istehlakın artmasına hələlik ciddi təsir göstərmir.
