COP29 tədbiri üçün xüsusi məlumat kitabçası hazırlanıb
COP29 tədbirinin dəyərli qonaqları üçün xüsusi olaraq məlumat kitabçası hazırlanıb.
QHT.az xəbər verir ki, bu vəsait vasitəsilə nümayəndələr və ziyarətçilər Bakı Stadionundakı COP29-un Mavi və Yaşıl Zonalarında təqdim olunan imkanlarla yaxından tanış ola biləcəklər. Kitabçada tədbirin keçirildiyi məkanlar, yemək xidmətlərinin yerləşdiyi nöqtələr, tərcümə xidmətləri, konfrans otaqları və digər rahatlıq imkanları barədə detallı məlumatlar öz əksini tapıb. Eyni zamanda, kitabçada akkreditasiya, viza prosedurları, yerləşmə, nəqliyyat, Bakının tarixi və mədəni abidələri, görməli yerləri və digər lazımi məlumatlar da qonaqlar üçün təqdim olunub. Dayanıqlılıq və müyəssərlik prinsipləri əsasında hazırlanan bu kitabça, konfrans iştirakçılarının səfərini daha rahat və asan keçirməsini təmin etmək məqsədini daşıyır.
COP29 konfransı müddətində təlimat kitabçasını rəsmi vebsaytdan yükləmək, həmçinin Bakı Hava Limanındakı məlumat masalarından əldə etmək mümkündür. Tədbirin effektiv və dayanıqlı şəkildə təşkil edilməsini təmin etmək məqsədilə hazırlanan bu kitabça, iştirakçılara unudulmaz bir COP29 təcrübəsi yaşatmağı hədəfləyir.
R.İmanov