Aşağı və orta gəlirli ölkələr köhnəlmiş və sərt sistemlərdən yan keçərək innovasiyanı qəbul etməklə səhiyyədə süni intellektin tətbiqi baxımından yüksək gəlirli ölkələri geridə qoya bilər. Clinton Health Access Initiative təşkilatının baş icraçı direktoru Neil Buddy Shah Devex Impact House tədbirində bu məsələyə münasibət bildirib.
QHT.az xarici mediaya istinadən bildirir ki, süni intellekt aşağı və orta gəlirli ölkələrdə səhiyyə nəticələrinin yaxşılaşdırılmasına daha böyük töhfə vermək potensialına malikdir. Clinton Health Access Initiative təşkilatının baş icraçı direktoru Dr. Neil Buddy Shahın sözlərinə görə, bunun səbəblərindən biri həmin ölkələrdə köhnə institusional sistemlərin yaratdığı müqavimətin eyni səviyyədə olmaması və innovasiyaya marağın daha böyük olmasıdır.
“Dünyanın ilk və ən yaxşı klinik süni intellekt köməkçisinin və ya süni intellekt həkiminin ilk olaraq aşağı gəlirli ölkədə hazırlanması üçün həqiqətən də imkan var”, – deyə o, BMT Baş Assambleyasının 81-ci sessiyası çərçivəsində keçirilən Devex Impact House tədbirində bildirib.
“Qlobal Cənubun innovasiyada önə çıxdığı və sıçrayış etdiyi nümunələri öyrənməyə və onlardan nəticə çıxarmağa çalışırıq ki, həmin təcrübələrdən bəzilərini tətbiq edə bilib-bilməyəcəyimizi müəyyənləşdirək”, – deyə Shah əlavə edib.
Piranə Xasiyeva
