Çinin Long March 7A raketi bazar ertəsi axşamı Haynan adasındakı Vençan Kosmik Buraxılış Mərkəzindən ChinaSat-4B (Zhongxing-4B) rabitə peykini orbitə çıxarmaq üçün havaya qalxıb. Lakin raket uçuşdan cəmi 85 saniyə sonra havada partlayaraq missiya uğursuzluqla nəticələnib.
QHT.az xarici mediaya istinadən xəbər verir ki, Çin dövlət xəbər agentliyi Sinxua raketin uçuş zamanı texniki nasazlıqla üzləşdiyini açıqlayıb. Agentliyin məlumatına görə, hadisənin səbəbləri araşdırılır.
Partlayışa baxmayaraq, Çin dövlət mediası hadisəni geniş işıqlandırmayıb. Sosial şəbəkələrdə istifadəçilərin paylaşdığı görüntülərin isə silindiyi və ya axtarış nəticələrində geri plana keçirildiyi bildirilir. Bu, Long March 7A raketinin 18-ci missiyası olub və model üçün 2020-ci ildəki ilk uçuşdan sonra ikinci uğursuzluq kimi qeydə alınıb.
Hadisədən sonra Çinin özəl LandSpace şirkəti tərəfindən hazırlanmış və ölkənin ilk ciddi təkrar istifadə oluna bilən raket layihəsi hesab edilən Zhuque-3 raketinin planlaşdırılan buraxılışı da təxirə salınıb.
Çin 2050-ci ilə qədər kosmik tədqiqatlar sahəsində dünya liderinə çevrilməyi hədəfləyir və bu istiqamətdə ABŞ ilə ciddi rəqabət aparır. Ölkə son aylarda təkrar istifadə oluna bilən raket texnologiyasında mühüm irəliləyişlər əldə etsə də, Long March 7A-nın uğursuz buraxılışı Çin kosmik proqramı üçün nadir, lakin diqqətçəkən geriləmə kimi qiymətləndirilir.
Zəhra Mansırova
