ABŞ administrasiyası Conni Fiqeroanı ABŞ Prezidentinin QİÇS-lə Mübarizə üzrə Fövqəladə Planına rəhbərlik edəcək səfir vəzifəsinə namizəd göstərib. Təyinat Senat tərəfindən təsdiqlənərsə, Fiqeroa qlobal səhiyyənin ən mühüm proqramlarından birinin rəhbərliyini öz üzərinə götürəcək.
QHT.az xarici mediaya istinadən bildirir ki, məqalədə qeyd olunur ki, son illərdə PEPFAR-ın qarşısında duran əsas çağırışlardan biri proqramın fəaliyyətində səmərəlilik və xərclərin azaldılması məqsədləri ilə insan yönümlü yanaşma arasında balansın qorunmasıdır. Ekspertlər xəbərdarlıq edirlər ki, yalnız maliyyə göstəricilərinə və inzibati nəticələrə üstünlük verilməsi proqramın əsas missiyasına mənfi təsir göstərə bilər.
PEPFAR-ın keçmiş baş elmi əməkdaşı Maykl C.A. Rid bildirib ki, qurumun uğurunun əsas səbəbi illər boyu insanların ehtiyaclarını prioritet hesab etməsi olub. Onun sözlərinə görə, həddindən artıq qənaət və performans göstəricilərinə fokuslanmaq proqramın effektivliyini zəiflədə və etimadın azalmasına səbəb ola bilər.
Mütəxəssis hesab edir ki, PEPFAR təkcə ABŞ-nin deyil, ümumilikdə qlobal səhiyyə sahəsinin ən uğurlu təşəbbüslərindən biridir. Buna görə də yeni rəhbərlik dövründə proqramın əsas məqsədlərinin və insan mərkəzli yanaşmasının qorunması xüsusi əhəmiyyət daşıyacaq.
Ekspertlərin fikrincə, qarşıdakı dövr PEPFAR-ın gələcək inkişaf istiqamətinin müəyyənləşdirilməsi baxımından həlledici mərhələ olacaq.
Piranə Xasiyeva
