Son illərdə gənclər və tələbələr arasında, xüsusən də imtahan ərəfələrində və sıx iş qrafikində enerji içkilərinə tələbat kəskin şəkildə artıb. İstehsalçılar bu içkilərin zehni fəaliyyəti gücləndirdiyini, gümrahlıq verdiyini iddia etsələr də, tibb mütəxəssisləri həyəcan təbili çalır. Bəs bir bədənə bu qədər süni enerji yükləməyin nəticəsi nədir?
QHT.az xəbər verir ki, enerji içkilərinin tərkibindəki əsas aktiv maddə kofein və yüksək miqdarda şəkərdir. Bir qutu enerji içkisində olan kofein miqdarı bir neçə fincan tünd qəhvəyə bərabər ola bilər. Ürək-damar sisteminə zərbə: Yüksək dozada kofein qəbulu qan təzyiqini qəfil yüksəldir, ürək döyüntülərini sürətləndirir və hətta gənc yaşlarda ürək tutmalarına yol aça bilir.
Şəkər koması və piylənmə: Bu içkilərdəki şəkər miqdarı bədənin gündəlik ehtiyacından qat-qat artıqdır. Bu isə ani enerji artımından sonra kəskin halsızlıq yaradır, uzunmüddətli dövrdə isə piylənmə və Şəkərli Diabet riskini artırır. Enerji içkiləri sinir sistemini məcburi şəkildə stimullaşdırır. Bu stimullaşdırma keçici bir gümrahlıq versə də, bədən dincəlməli olduğu halda onu oyaq saxlayır.
Yuxu pozğunluğu və İnsomniya: Daimi istifadə yuxu rejmini tamamilə alt-üst edir. Yuxusuz qalan beyin isə ertəsi gün daha çox enerji içkisi tələb edir və insan döngüyə girir.
Təşviş və Əsəbilik: Kofeinin yüksək dozası bədəndə stress hormonlarını (adrenalin) artırır. Nəticədə insan özünü gərgin, əsəbi və narahat hiss edir.
Mütəxəssislərin rəyinə görə enerji içkiləri bədənə kənardan enerji qazandırmır. Onlar sadəcə hüceyrələrinizin gələcəkdə istifadə edəcəyi daxili enerjini öncədən və amansızcasına xərcləyir. Bir növ orqanizmdən 'borc' enerji alır. İmtahanlara hazırlaşarkən və ya zehni yorğunluq zamanı süni vasitələrə qaçmaq əvəzinə, orqanizmi təbii yollarla dəstəkləmək lazımdır. Bol su içmək, təbii meyvə şirələri və nizamlı yuxu həm sağlamlığınızı qoruyar, həm də beyninizin daha məhsuldar işləməsini təmin edər. Unutmayın, heç bir uğur sağlamlığınızdan daha dəyərli deyil.
