2026-cı maliyyə ilində Dünya Bankı 28 min 995 müqavilə imzalayıb. Müqavilələrin ümumi dəyəri 15,6 milyard ABŞ dolları olub. Ən çox maliyyə alan ilk 10 podratçı ümumi müqavilə məbləğinin təxminən 12 faizini əldə edib.
QHT.az xarici mediaya istinadən bildirir ki, beynəlxalq yardımlarda ixtisarlar olsa da, Dünya Bankı və digər çoxtərəfli inkişaf banklarının maliyyələşdirməsi sabit qalır. Eyni zamanda, xeyriyyə fondlarının dəstəyi artır.
Məlumata görə, süni intellekt sahəsində formalaşan yeni sərvətlərin gələcəkdə beynəlxalq inkişaf və humanitar layihələrin maliyyələşdirilməsinə daha çox vəsait yönəldəcəyi gözlənilir.
Bundan əlavə, ABŞ ərzaq yardımı üzrə iki yeni maliyyə paketi ayırıb, İsveçrə xarici yardım sistemində islahatlara başlayıb, Böyük Britaniya isə yardım büdcəsindəki ixtisarların istiqamətlərini açıqlayıb.
