Yeni Dehlidə təhsil sistemində hesabatlılıq tələb edən dinc etiraz aksiyalarına polis müdaxiləsi beynəlxalq narahatlıq doğurub. Amnesty International India təşkilatının İdarə Heyətinin sədri Aakar Patel polis tərəfindən dinc etirazçılara qarşı həddindən artıq güc tətbiq edildiyini bildirib.
QHT.az xarici mediaya istinadən bildirir ki, polis etirazçıların parlamentə yürüşünün qarşısını almaq üçün barrikadalar qurub, metro xidmətini və mobil interneti məhdudlaşdırıb. Amnesty International bu addımların dinc toplaşmaq hüququnun pozulması olduğunu qeyd edərək, hadisələrin müstəqil və qərəzsiz araşdırılmasına çağırıb.
Etirazçılar imtahan suallarının sızdırılması ilə bağlı məsul şəxslərin cəzalandırılmasını tələb edirlər. Aclıq aksiyası keçirən fəal Sonam Vanqçuk isə 18 iyulda polis tərəfindən istəyi əleyhinə xəstəxanaya aparılıb.
20 iyulda nümayişçilər parlamentə yürüş edərək təhsil naziri Dharmendra Pradhanın istefasını tələb ediblər. Sosial şəbəkələrdə polis əməkdaşlarının etirazçılara qarşı dəyənək, gözyaşardıcı qaz və daşlardan istifadə etdiyi iddiaları yayılıb.
Xatırladaq ki, 2026-cı ilin mayında NEET-UG imtahanında sualların sızdırılması iddialarından sonra imtahanın nəticələri ləğv edilmiş, iki milyondan çox şagird yenidən imtahan verməyə məcbur qalmışdı.
