Pərvanə Vəliyeva: "Səhiyyə QHT-lərinin fəaliyyəti və gənc alimlərə dəstək təşviq edilməlidir"
"Ölkəmizdə səhiyyə maarifçiliyi və məlumatlılığının artırılması istiqamətində QHT-lər çox fəaldır. Hemofiliya, kistik fibroz, xərçəng, leykemiya, autizm spektrum, daun sindromu, infeksion xəstəliklər, vərəm, İİV/QİÇS, viruslu hepatitlər və s. kimi xəstəliklərlə mübarizə və dəstək tədbirlərində uğurlu fəaliyyət göstərən ictimai birliklər var".
Bu fikirləri Məclisin Səhiyyə Komitəsinin üzvü, deputat Pərvanə Vəliyeva QHT.az-a açıqlamasında bildirib. Deputatın sözlərinə görə, onlardan bəziləri pasiyentlərə xidmətlərin göstərilməsi – xəstəlikdən əziyyət çəkən insanlara dərman preparatları və digər tibbi vasitələrin paylanmasında, müayinə üçün nümunələrin daşınmasında, psixoloji dəstəyin göstərilməsində də fəal iştirak edirlər:
"QHT-lərin bu fəaliyyətinin təşviqi məqsədilə QHT-lərə Dövlət Dəstəyi Agentliyi tərəfindən bu mövzuya müsabiqələrdə xüsusi yer verilir və maliyyə dəstəyi göstərilir. Səhiyyə QHT-ləri dünya səhiyyə elmində tətbiq edilən yeniliklərin cəmiyyətə çatdırılması, ölkəmizdə və xaricdə beynəlxalq elmi-praktiki konfransların keçirilməsi, ölkəmizin səhiyyə sahəsində uğurlarının beynəlxalq arenada da tanıdılmasında fəal iştirak edirlər. Bununla belə səhiyyə sahəsində tədqiqatlar aparan QHT-lərin, səhiyyə assosasiyaların sayının artırılmasına, onların fəaliyyətinin təşviq olunmasına ehtiyac olduğunu düşünürəm. Nəticədə, bu, gənc alimlərin fəaliyyətinə də dəstək olacaqdır".
Pərvanə Fərhadqızı
QHT.az