“Səma və Eko” Sosial-İqtisadi İnkişafa Yardım İctimai Birliyinin sədri İradə Həsənova QHT.az-a açıqlamasında bildirib ki, ekoloji balansın qorunmasında əsas tədbirlərdən biri su hövzələrində balıq ehtiyatlarının artırılmasıdır.

QHT sədri qeyd edib ki, balıq ovu sənaye, həvəskar və idman, elmi tədqiqat və balıq artırma nəzarəti, təbii mühitə uyğunlaşma və köçürülmə məqsədilə həyata keçirilir:

"Hazırda balıq ehtiatlarının artırılması istiqamətində respublikamızda Dövlət Balıq Mühafizə Xidməti yaradılmışdır. Xidmət balıqçılılq subyektlərinə nəzarəti, qanunsuz balıq ovunun qarşısının alınması,o cümlədən Xəzər hövzəsinin Azərbaycana aid hissəsində və digər balıqla zəngin su hövzələrində nəzarəti həyata keçirir. Bundan başqa “Balıqçılıq haqqında” Azərbaycan Respublikasının qanununa əsasən ölkə ərazisində balıq ovu ödənişlidir və qanunvericilikdə müəyən edilmiş qaydada balıq ovlama biletləri əsasında həyata keçirilir. Təbii su hövzələrində balıq ehtiyatlarının məhsuldarlığının yüksəldilməsi, su ehtiyatlarının sanitar vəziyyəti nəzarət altında saxlanılır. Qanunvericiliyə əsasən bütün ilboyu sənaye məqsədləri ilə balıqların ovlanması qadağan edilmişdir. Hazırda su hövzələrində balıqların, digər su heyvanlarının və bitkilərin artırılması, bərpası, yetişdirilməsi, istifadəsi və mühafizəsi istiqamətində səmərəli işlər aparılır".

İradə Həsənova vurğulayıb ki, bu məqsədlə respublikamızda hal-hazırda 12 balıqartırma müəssisəsi fəaliyyət göstərir, əsas problem Xəzər regionunda ekoloji tarazlığın qorunması və həmin hövzədəki nadir balıq növlərinin qorunmasıdır. Onun sözlərinə görə, hər il Xəzər dənizinə 20 milyona qədər nərə balığı körpəsi buraxılırdısa, son illər Xəzəryanı ölkələrdə nərəkimilərin artım miqyası azalmaq üzrə gedir:

"Bu da Xəzər dənizindəki nadir balıq növünün – nərə balığının azalmasına səbəb olur. Dənizin çirklənməsi,dənizə axan çayların üzərində bəndlərin tikilməsi Xəzər dənizi ekosistemində stabilliyin pozulmasına gətirib çıxarır ki, bu da hövzədəki nadir balıq növlərinin kütləvi surətdə məhvinə səbəb olur. İstər Xəzər hövzəsi, istərsə də digər su hövzələrində bioresusların qorunub saxlanması istiqamətində ekoloji sahələr üzrə ixtisaslaşmış QHT-lərin üzərinə mühüm vəzifələr düşür. Xəzər hövzəsinin ölkələrinin QHT-ləri bu istiqamətdə birgə işlək mexanizm hazırlamalı və ekosistemin sağlamlaşdırılması, su hövzələrində yaşayan canlıların mühafizəsi üçün komleks tədbirlər keçirməlidirlər. Əhali arasında qanunsuz balıq ovuna o cümlədən su hövzələrinin çirkləndirilməsinə qarşı geniş maarifləndirmə işlərinin aparılması zəruridir. Regionlarda bununla əlaqədar olaraq kütləvi tədbirlərin,seminar və mühazirələrin təşkil edilməsi məqsədəuyğun olardı".

Qeyd edək ki, Ekologiya və Təbii Sərvətlər Nazirliyinin məlumatına görə, balıq və digər su bioresurslarının kürüləmə dövrü ilə əlaqədar 1 aprel 2025-ci ildən etibarən Kür çayında, Sarısu gölündə, Mingəçevir, Şəmkir, Araz və Yenikənd su anbarlarında sənaye balıq ovuna moratorium tətbiq ediləcək.

Pərvanə Fərhadqızı

QHT.az