Qaraciyər yağlanması xəstəliyinə səbəb olan nadir genetik variant kəşf edildi
Amerikanın Mayo Klinikasının Fərdiləşdirilmiş Tibb Mərkəzinin alimləri metabolik disfunksiya ilə əlaqəli qaraciyər yağlanmasına səbəb ola biləcək nadir genetik variant müəyyən ediblər.
QHT.az xəbər verir ki, əvvəllər alkoqolsuz yağlı qaraciyər xəstəliyi kimi tanınan bu vəziyyətin həm genetik, həm də ətraf mühit faktorlarının təsiri ilə inkişaf etdiyi düşünülürdü. Lakin araşdırma göstərir ki, bəzi hallarda təkcə genetik variant xəstəliyin əsas səbəbi ola bilər. Araşdırma nəticəsində qaraciyərin regenerasiyasına və piy mübadiləsinə nəzarət edən MET genində dəyişiklik müəyyən edilib. Bu mutasiya qaraciyər hüceyrələrində piy yığılmasına, iltihaba və nəticədə fibroz, sirroz və xərçəngə səbəb ola bilər.
Hazırda bu xəstəlik dünya üzrə yetkinlərin təxminən üçdə birinə təsir edir və yaxın illərdə sirroz və qaraciyər transplantasiyasının əsas səbəbinə çevriləcəyi proqnozlaşdırılır. Kəşf nadir genetik variantların geniş yayılmış xəstəliklərdə rolunu anlamağa imkan verəcək və gələcək terapevtik hədəflərin müəyyənləşdirilməsinə yol açacaq.
R.İmanov