19 sentyabr 2026-cı il tarixində Bakı şəhərində “Yaşayan Mədəniyyət – Bakı Mədəni Maarifləndirmə Festivalı” keçirilib.
Festival Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, Azərbaycan Respublikasının Dövlət Turizm Agentliyinin, Suraxanı Rayon İcra Hakimiyyətinin və “Qeyd-Sosial Maarifləndirmə” İctimai Birliyinin birgə təşkilatçılığı ilə təşkil olunub.
Tədbirin keçirilməsində məqsəd Azərbaycan xalqının zəngin mədəni irsinin və milli-mənəvi dəyərlərinin təbliği, mədəniyyət sahəsində ictimai maarifləndirmənin gücləndirilməsi, mədəni irsin qorunması və gələcək nəsillərə ötürülməsinə ictimai dəstəyin artırılması, həmçinin uşaqların və gənclərin mədəniyyətə və milli irsə marağının təşviq edilməsindən ibarət olub.
Festivalın əvvəlində Azərbaycanın dövlət suverenliyi və ərazi bütövlüyü uğrunda canından keçmiş şəhidlərin əziz xatirəsi bir dəqiqəlik sükutla yad edilib. Daha sonra Azərbaycan Respublikasının Dövlət Himni səsləndirilib.
Tədbirdə Suraxanı Rayon İcra Hakimiyyətinin başçısı Adil Əliyev, Qoruqların İdarəetmə Mərkəzinin İdarə Heyətinin sədri Murad Ağabəyli, “Qeyd-Sosial Maarifləndirmə” İctimai Birliyinin Baş katibi Aysel Tahirova, Milli Məclisin deputatları Ülviyyə Həmzəyeva, Rizvan Nəbiyev, Rövşən Muradov, Arzuxan Əlizadə və Vüqar İskəndərov çıxış ediblər.
Çıxışlarda Azərbaycan mədəniyyətinin və mədəni irs nümunələrinin qorunması, təbliği və tanıdılması, milli-mənəvi dəyərlərin gələcək nəsillərə çatdırılması, mədəniyyət sahəsində maarifləndirici tədbirlərin həyata keçirilməsi və bu istiqamətdə ictimai təşəbbüslərin dəstəklənməsinin əhəmiyyəti diqqətə çatdırılıb.
Festival çərçivəsində mədəniyyət və mədəni irs mövzusunda panel müzakirəsi təşkil olunub. Müzakirə zamanı mədəni irsin qorunması və təbliği, mədəniyyət sahəsində maarifləndirmə fəaliyyətinin genişləndirilməsi, eləcə də mədəni dəyərlərin cəmiyyətə çatdırılması istiqamətində həyata keçirilən tədbirlər barədə fikir mübadiləsi aparılıb.
Tədbirin proqramına konsert proqramı, mədəni təqdimatlar, uşaqlar üçün teatr tamaşası və film nümayişi daxil olub.
Festival çərçivəsində Bakı Uşaq və Gənclər Teatrının təqdimatında “Sehrli güzgü” tamaşası nümayiş etdirilib. Tamaşa uşaqların mədəni və estetik dünyagörüşünün inkişafına, onların teatr sənətinə marağının artırılmasına xidmət edib.
Günün sonunda festival iştirakçıları üçün açıq səma altında Azərbaycan kinosunun klassik nümunələrindən olan “Əhməd haradadır?” filminin nümayişi təşkil olunub.
“Yaşayan Mədəniyyət – Bakı Mədəni Maarifləndirmə Festivalı” çərçivəsində keçirilən tədbirlər Azərbaycan mədəniyyətinin və mədəni irsin müxtəlif istiqamətlərinin ictimaiyyətə təqdim olunmasına, mədəni maarifləndirmənin genişləndirilməsinə və milli-mədəni dəyərlərin təbliğinə yönəlib.
Festivalın keçirilməsi mədəni irsin qorunması və təbliği sahəsində dövlət qurumları və vətəndaş cəmiyyəti institutları arasında əməkdaşlığın inkişafına, həmçinin mədəniyyətə dair maarifləndirici təşəbbüslərin dəstəklənməsinə töhfə verib.
