Karib dənizində yerləşən kiçik ada dövləti olan "Sent-Lusiya" xərçəng xəstəliyinin qarşısının alınması, müalicənin yaxşılaşdırılması və səhiyyə xidmətlərinin daha düzgün planlaşdırılması məqsədilə Milli Xərçəng Reyestrini istifadəyə verib.
QHT.az xarici mediaya istinadən bildirir ki, reyestrin təqdimatı “Fəaliyyət üçün məlumatlar: Xərçəngə qarşı daha güclü mübarizənin qurulması” mövzusunda keçirilib. Tədbirdə Səhiyyə Nazirliyi ilə yanaşı, PAHO, CARPHA və IARC kimi beynəlxalq və regional təşkilatların nümayəndələri iştirak edib.
Yeni sistem ölkə üzrə xərçəng halları, xəstəliyin yayılması, dəyişən tendensiyalar və müalicə nəticələri barədə məlumatları toplayacaq və təhlil edəcək. Bu məlumatlar səhiyyə siyasətinin hazırlanmasına, resursların düzgün bölüşdürülməsinə və xərçəngin qarşısının alınması proqramlarının gücləndirilməsinə kömək edəcək.
Səhiyyə rəsmiləri xüsusilə gənc yaş qruplarında xərçəng diaqnozlarının artması ilə bağlı narahatlıqları qeyd ediblər. Bildirilib ki, əvvəlki məlumatların məhdud olması xəstəliyin yayılmasındakı dəyişiklikləri tam müəyyənləşdirməyə imkan verməyib.
Milli Xərçəng Reyestrinin fəaliyyəti erkən aşkarlama, skrininq, müalicə və xəstələrə tibbi dəstəyin yaxşılaşdırılmasına şərait yaradacaq. Səhiyyə Nazirliyi reyestrin davamlı fəaliyyət göstərməsi və ölkənin ümumi səhiyyə sisteminə inteqrasiyası üçün işlərin davam etdiriləcəyini açıqlayıb.
