Süni intellekt şirkəti OpenAI əsas rəqiblərindən biri olan Anthropic ilə mübarizədə bazar payını artırmaq məqsədilə xidmət qiymətlərini əhəmiyyətli dərəcədə azaltmağı nəzərdən keçirir.
QHT.az xarici mediaya istinadən bildirir ki, The Wall Street Journal qəzetinin məsələ ilə tanış mənbələrə istinadən yaydığı məlumata görə, şirkət süni intellekt xidmətlərinin qiymətləndirilməsində istifadə olunan əsas ölçü vahidi – tokenlər üzrə tarifləri aşağı sala bilər. Bununla belə, müzakirələrin hələ yekunlaşmadığı və müxtəlif variantların nəzərdən keçirildiyi bildirilir.
Tokenlər istifadəçilərin süni intellekt modellərinə göndərdiyi və onlardan aldığı mətnlərin həcmini ölçmək üçün istifadə olunur. Bu səbəbdən token qiymətlərində mümkün endirimlər həm fərdi istifadəçilər, həm də biznes müştəriləri üçün xərclərin azalmasına səbəb ola bilər.
Reuters The Wall Street Journalın məlumatını müstəqil şəkildə təsdiqləyə bilməyib. OpenAI isə məsələ ilə bağlı hələlik rəsmi açıqlama verməyib.
Son aylarda süni intellekt bazarında rəqabət daha da güclənib. OpenAI, Anthropic və digər şirkətlər həm yeni istifadəçilər cəlb etmək, həm də korporativ müştəriləri saxlamaq üçün məhsullarını və qiymət siyasətlərini yenidən nəzərdən keçirirlər.
