ABŞ və onun tərəfdaş ölkələrinin kəşfiyyat qurumları süni intellekt texnologiyalarının yaxın aylarda hökumət və biznes strukturlarının kibermüdafiə sistemlərini aşmaq potensialına malik ola biləcəyi barədə xəbərdarlıq ediblər.
QHT.az xarici mediaya istinadən xəbər verir ki, ABŞ, Böyük Britaniya, Kanada, Avstraliya və Yeni Zelandiyanı birləşdirən Five Eyes kəşfiyyat alyansı birgə bəyanat yayaraq hökumətləri və şirkət rəhbərlərini mürəkkəb kibertəhdidlərə qarşı müdafiə tədbirlərini təxirə salmadan gücləndirməyə çağırıb.
Bəyanatda qeyd olunub ki, süni intellekt modellərinin inkişaf sürəti nəzərə alınarsa, genişmiqyaslı kiberhücumlar həyata keçirə bilən sistemlərin meydana çıxması illərlə deyil, aylarla ölçülən zaman məsələsinə çevrilə bilər.
Xəbərdarlıq ABŞ administrasiyasının süni intellekt şirkəti Anthropic-ə məxsus ən qabaqcıl modellərin xarici vətəndaşlar tərəfindən istifadəsinin dayandırılması barədə qərarından sonra səsləndirilib. Bu addım Qərb ölkələrinin süni intellektin sürətlə artan imkanları ilə bağlı narahatlıqlarının gücləndiyini göstərir.
Ekspertlər hesab edirlər ki, süni intellekt texnologiyaları kibertəhlükəsizlik sahəsində yeni imkanlar yaratmaqla yanaşı, hakerlərin istifadə edə biləcəyi daha mürəkkəb və avtomatlaşdırılmış hücum vasitələrinin meydana çıxmasına da səbəb ola bilər. Buna görə də dövlət qurumları və özəl sektorun kibermüdafiə sistemlərini indidən gücləndirməsi vacib hesab olunur.
