QHT.az Ədliyyə Nazirliyinin rəsmi feysbulk səhifəsinə istinadən oxucular üçün maraqlı olan aşağıdakı məlumatı təqdim edir:
"Məlumat verildiyi kimi, pandemiya ilə əlaqədar karantin şəraitinə uyğun olaraq penitensiar müəssisələrə daxil olan vəkillərə və müstəntiqlərə onların rahatlığı üçün Ədliyyə Nazirliyi tibb xidməti tərəfindən pulsuz PCR testin verilməsi təşkil edilmişdir.
Həmin şəxslər Bakı şəhəri, Nizami rayonu, Müzəffər Nərimanov küçəsi 1 ünvanında yerləşən tibb məntəqəmizdə test verə bilərlər.
Son iki gündə koronavirus testindən keçmək üçün bəzi vəkillər hüquqi yardımın göstərilməsi ilə bağlı tələb olunan müvafiq sənədləri təqdim etməsə də, onlara həssaslıqla yanaşılaraq testdən keçmələrinə imkan yaradılmış və zəruri izahlar verilmişdir. Həmin 5 vəkildən götürülmüş PCR testin nəticələrinə əsasən onlardan birində virusa yoluxma halı aşkar olunmuşdur. O, bu barədə məlumatlandırılmış və ona müvafiq qayğı göstərilərək müayinə və müalicə keçməsi, təcrid olunması ilə bağlı tövsiyələr verilmişdir.
Vəkillərdən PCR testindən keçmək üçün müraciət edərkən şəxsiyyət vəsiqəsi ilə yanaşı, aidiyyəti sənədləri təqdim etmələri xahiş olunur.
