Dünyanın ən böyük beynəlxalq yardım təşkilatlarından üçü – CARE, Save the Children və Prosper Global – fəaliyyətlərini daha səmərəli təşkil etmək və eyni işlərin təkrarlanmasının qarşısını almaq üçün yeni əməkdaşlığa başlayıb. Təşkilatlar bu əməkdaşlığı Impact Alliance adlandırıblar.
QHT.az xarici mediaya istinadən bildirir ki, yeni ittifaq üç əsas istiqaməti əhatə edir. Bunlara birgə satınalmaların təşkili, səmərəliliyi artıq sübut edilmiş yardım proqramlarının daha geniş miqyasda tətbiqi və icmaların ehtiyacları barədə məlumatların birlikdə toplanması daxildir.
Təşkilatların məqsədi resurslardan daha səmərəli istifadə etmək, xərcləri azaltmaq və yardım proqramlarının təsirini artırmaqdır. Birgə satınalmalar vasitəsilə bəzi məhsul və xidmətlərin daha əlverişli şərtlərlə əldə edilməsi gözlənilir.
Eyni zamanda, uğurlu nəticə verən layihələrin daha çox ölkə və icmada tətbiq edilməsi planlaşdırılır. Təşkilatlar yerli icmaların fikirlərini və ehtiyaclarını daha yaxşı öyrənməklə yardım proqramlarını onların real tələblərinə uyğunlaşdırmaq istəyirlər.
Bildirilib ki, Impact Alliance birləşmə deyil. Üç təşkilatın hər biri müstəqil olaraq qalır, öz rəhbərliyini, missiyasını, proqramlarını və fəaliyyət sahələrini qoruyur. Bununla belə, yeni əməkdaşlıq onların fəaliyyətlərini əvvəlkindən daha sıx əlaqələndirəcək.
