Diş ətindən qanaxma təkcə ağız boşluğu problemi deyil, həm də gələcəkdə 2-ci tip diabet riskinin erkən xəbərçisi ola bilər. Yeni araşdırma ağız sağlamlığı ilə metabolik xəstəliklər arasında güclü əlaqə olduğunu ortaya qoyub.
QHT.az xarici mediaya istinadən xəbər verir ki, The Lancet Public Health jurnalında dərc olunan və 300 mindən çox insanın məlumatlarını əhatə edən genişmiqyaslı araşdırmaya əsasən, ağır diş əti xəstəliyi (periodontit) olan şəxslərdə 2-ci tip diabetin inkişaf riski daha yüksəkdir.
Araşdırmada 16 ölkədən 28 uzunmüddətli tədqiqat təhlil edilib. Təxminən 29 min iştirakçının 5-20 il ərzində izlənilməsi göstərib ki, periodontiti olan insanlarda 2-ci tip diabetə tutulma ehtimalı sağlam diş ətinə sahib şəxslərlə müqayisədə 18-25 faiz daha yüksəkdir.
Bundan əlavə, bütün dişlərini itirmiş şəxslərdə diabet diaqnozu alma riski 30 faiz artıq olub. Tədqiqat diabeti olan insanların da sonrakı illərdə diş əti xəstəlikləri və diş itkisi ilə daha çox üzləşdiyini göstərib.
Mütəxəssislərin fikrincə, bu əlaqənin əsas səbəbi ağız boşluğundakı xroniki iltihabdır. Diş ətində yaranan bakteriyalar və iltihab molekulları qan dövranına keçərək orqanizmdə insulin müqavimətini artıra bilər. Əksinə, yüksək qan şəkəri də toxumaların sağalmasını ləngidir və diş əti xəstəliklərinin yaranma riskini yüksəldir.
Mütəxəssislər bildirirlər ki, diş ətlərində qızartı, şişkinlik, geri çəkilmə və ya tez-tez qanaxma müşahidə edən, xüsusilə də diabet üçün risk faktorları olan şəxslər vaxt itirmədən diş həkiminə müraciət etməlidirlər.
Hazırda dünyada təxminən 830 milyon insan diabetdən, 3,7 milyard insan isə ağız boşluğu xəstəliklərindən əziyyət çəkir. Alimlər ağız sağlamlığının diabetin qarşısının alınması və müalicəsi proqramlarına daha geniş şəkildə daxil edilməsinin vacibliyini vurğulayırlar.
