BlackBerry illik gəlir proqnozunu yüksəldib. Şirkət bu qərarı QNX proqram təminatı bölməsinin güclü inkişafı və proqram əsaslı avtomobillərə artan tələbat fonunda qəbul edib. Xəbərin ardından şirkətin Toronto birjasında ticarət olunan səhmləri təxminən 19%, ABŞ-da isə 20% bahalaşıb.
QHT.az xarici mediaya istinadən xəbər verir ki, bir vaxtlar smartfon bazarının aparıcı şirkətlərindən olan BlackBerry son illərdə fəaliyyət istiqamətini dəyişərək əlaqəli cihazlar və avtonom nəqliyyat vasitələri üçün proqram təminatının hazırlanmasına yönəlib.
Şirkətin avtomobil sənayesi üçün təhlükəsiz real vaxt əməliyyat sistemləri hazırlayan QNX bölməsi 31 mayda başa çatan 2027-ci maliyyə ilinin ilk rübündə gəlirlərini illik müqayisədə 26% artıraraq 72,3 milyon dollara çatdırıb. Bölmənin gələcək royalti gəlirləri üzrə sifariş portfeli isə 1 milyard dollara yaxındır.
BlackBerry-nin baş icraçı direktoru Con Giamatteo bildirib ki, şirkətin müştəriləri yeni nəsil proqram əsaslı avtomobillərin hazırlanmasına daha çox yatırım edir və bu istiqamətdə QNX platformasına tələbat sağlam səviyyədə qalır.
Müsbət nəticələr fonunda BlackBerry 2027-ci maliyyə ili üzrə ümumi gəlir proqnozunu əvvəlki 584–611 milyon dollar aralığından 594–621 milyon dollara yüksəldib.
Şirkət həmçinin QNX bölməsi üzrə illik gəlir proqnozunu 290–307 milyon dollardan 295–312 milyon dollara qaldırıb.
BlackBerry-nin şifrələnmiş səsli rabitə, mesajlaşma və kritik hadisələrin idarə olunması həllərini əhatə edən təhlükəsiz kommunikasiya bölməsi də uğurlu nəticə göstərərək ilk rübdə gəlirlərini 24% artırıb və 73,6 milyon dollara çatdırıb.
