DRK Fondunun baş icraçı direktoru Cim Bildner izah edir ki, sahibkarlıq yönümlü xeyriyyə təşkilatı investisiya etməzdən əvvəl nələrə diqqət yetirir, niyə eyni təşkilatı dəfələrlə maliyyələşdirmir və erkən mərhələdə göstərilən dəstəyin daha böyük kapital mənbələrinə çevrilməsi üçün nələrin lazım olduğunu açıqlayır.
QHT.az xarici mediaya istinadən xəbər bildirir ki, Draper Richards Kaplan Fondu (DRK Fondu) 20 ildən artıqdır ki, erkən mərhələdə olan 280 qeyri-kommersiya təşkilatına və sosial təsir yönümlü kommersiya müəssisəsinə investisiya yatırıb.
Fondun baş icraçı direktoru və yaxın zamanda nəşr olunacaq “A Matter of Hope” (“Ümid Məsələsi”) kitabının müəllifi Cim Bildner bildirib ki, təşkilatın ən dəyərli aktivi kapitalı deyil, “nümunələri tanımaq” bacarığıdır. Yəni, komandanın maliyyə vəsaitini real sosial təsirə çevirə biləcək liderləri və təşkilatları müəyyən etmək qabiliyyəti.
DRK Fondunun açıq müraciət prosesi – minlərlə müraciət arasından hər il cəmi 18–20 təşkilatın dəstək üçün seçilməsi – fondun bu nümunələri tanımaq bacarığını daha da inkişaf etdirməsinə kömək edib. ABŞ, Avropa və Afrika üzrə fəaliyyət göstərən 43 nəfərlik komanda potensial investisiya imkanlarını müəyyən etmək üçün yüzlərlə tərəfdaşdan ibarət şəbəkədən istifadə edir. Bildnerin sözlərinə görə, bu təcrübə DRK-ya sadəcə maraqlı ideyanı, mürəkkəb problemləri geniş miqyasda həll etmək potensialına malik təşkilatlardan ayırd etməyə imkan verir.
Zəhra Mansırova
