ABŞ-də generik dərman (patent müddəti başa çatmış orijinal dərmanın eyni təsiredici maddə ilə istehsal olunan daha ucuz variantı) istehsalçıları Prezident Donald Trampın idxal olunan generik dərmanlara yüksək gömrük rüsumu tətbiq etmək planından narahat olduqlarını bildiriblər. Onların sözlərinə görə, son illərdə istehsal artsa da, satınalma və ödəniş sistemi ilə bağlı problemlər hələ də qalır.
QHT.az xarici mediaya istinadən bildirir ki, Trampın planına əsasən, avqustun 1-dən etibarən iki il ərzində generik dərmanlara tarif tətbiq olunmayacaq. Daha sonra tariflər əvvəlcə 100 faizə, sonra isə 200 faizə qaldırılacaq.
Sektor nümayəndələri hesab edirlər ki, bu qərar ucuz generik dərmanların qiymətini artıra və onların əlçatanlığını azalda bilər. ABŞ bazarına generik dərman ixrac edən Hindistan şirkətlərinin səhmləri də qərardan sonra ucuzlaşıb. Generik dərman istehsalçıları hökumətlə bu məsələnin həlli üçün əməkdaşlığa hazır olduqlarını bildiriblər.
