ABŞ Ticarət Nazirliyi süni intellekt şirkəti Anthropic-in ən yeni “Mythos” və “Fable” modellərinin xarici ölkələrə çıxışını müvəqqəti dayandırıb.
QHT.az xarici mediaya istinadən xəbər verir ki, ABŞ Ticarət naziri Howard Lutnick şirkətə göndərdiyi məktubda bu modellərin Çin, Rusiya və digər narahatlıq doğuran ölkələrin hərbi və kəşfiyyat strukturları tərəfindən istifadə oluna biləcəyi riskini əsas gətirib.
Qərara əsasən, Anthropic modellərinin bütün xarici istiqamətlərə və xarici vətəndaşlara təqdim edilməsini dayandırmalı olub. Məlumata görə, şirkətin texniki heyəti məsələ ilə bağlı Vaşinqtonda ABŞ rəsmiləri ilə danışıqlar aparır.
ABŞ hökuməti modellərin ölkənin təhlükəsizliyinə zərər verə biləcək məqsədlərlə istifadəsinin qarşısının alınmasına dair təminatlar tələb edir. Anthropic isə istifadəçilərin ən yüksək səviyyəli modellərə çıxışını bərpa etməyə çalışır.
Şirkət bildirib ki, hökumət “Fable 5” modelinin proqram təminatındakı zəifliklərin aşkarlanmasına imkan verən qoruma mexanizmlərinin müəyyən üsullarla keçilə biləcəyini iddia edir. Anthropic isə aşkar edilən boşluqların məhdud xarakter daşıdığını və digər açıq süni intellekt modellərində də oxşar imkanların mövcud olduğunu qeyd edib.
Məlumata görə, Anthropic və ABŞ administrasiyası arasında münasibətlər bu ilin əvvəlində şirkətin süni intellekt modellərinin daxili nəzarət və tam avtonom silah sistemlərində istifadəsinə icazə verməməsindən sonra gərginləşib.
San-Fransiskoda yerləşən şirkət daha əvvəl “Mythos” modelinin kibertəhlükəsizlik sahəsində potensial imkanları ilə bağlı narahatlıqlar səbəbindən onun geniş istifadəyə verilməsini məhdudlaşdırmışdı.
