“Regional İnkişaf” İctimai Birliyinin bir qrup gənc əməkdaşı və koordinator könüllü kimi fəaliyyətə başlayacaq aktiv könüllüləri üçün “Könüllülərlə iş” proqramı çərçivəsində Şamaxı şəhərində düşərgə təşkil edilib. İki gün davam edən düşərgənin ilk günündə əməkdaş və könüllülərin şəxsi bacarıqlarını inkişaf etdirmək, koordinasiya və liderlik qabiliyyətlərini artırmaq məqsədilə bir sıra praktiki sessiyalar və təlimlər keçirilib.

QHT.az xəbər verir ki, ilk olaraq düşərgə iştirakçılarının müsahibələr zamanı namizədləri daha yaxşı tanımaları və şəxsiyyət tiplərini düzgün analiz etmələri üçün Layihələr və könüllülərlə iş şöbəsinin əməkdaşı İlkin Əliyarlı tərəfindən keçirilən “Müsahibələr zamanı namizədin şəxsiyyət tipinin təhlili” təlimində müxtəlif şəxsiyyət tipləri, onların əsas xüsusiyyətləri və fərqli xarakterə malik insanlarla effektiv ünsiyyət qurma yolları izah edilib. Daha sonra, Layihələr və könüllülərlə iş şöbəsinin əməkdaşı Şəfiqə Tağızadə tərəfindən könüllü müsahibələri zamanı könüllülərin düzgün seçimi və qiymətləndirilməsi üçün “Könüllü müsahibələri necə götürülməlidir?” təlimi baş tutub, müsahibə götürən və namizədlərin real vəziyyətdə necə reaksiya verdiklərini öyrənmək məqsədilə müxtəlif müsahibə simulyasiyaları həyata keçirilib.

Nahar fasiləsindən sonra iştirakçıların ünsiyyət bacarıqlarını inkişaf etdirmək və onların şəbəkələşməsini təmin etmək məqsədilə “Public Speaking” oyunu təşkil olunub. Oyun zamanı könüllülər auditoriya qarşısında çıxış edərək öz fikirlərini ifadə etməyi, ani suallara cavab verməyi və komanda olaraq auditoriyanı cəlb etməyi təcrübədən keçiriblər.

Günün ikinci yarısında İnsan resurslarının idarəedilməsi və sənədlərlə iş şöbəsinin müdiri Günay Cəfərli tərəfindən “İşgüzar etiket qaydaları”na həsr olunmuş təlim keçirilib. Təlim çərçivəsində iştirakçılara peşəkar mühitdə davranış qaydaları, görüşlər zamanı düzgün ünsiyyət qurma prinsipləri və korporativ mədəniyyət haqqında ətraflı məlumat verilib.

Günün sonunda isə könüllülər üçün Şamaxının tarixi və elmi məkanlarına ekskursiya təşkil olunub. Könüllülər əvvəlcə Şamaxı Cümə məscidini ziyarət edərək Azərbaycanın ən qədim məscidlərindən biri haqqında maraqlı məlumatlar əldə ediblər. Daha sonra Şamaxı Rəsədxanasına səfər edərək astronomiya elminin inkişafı, kosmos müşahidələri və rəsədxanada aparılan tədqiqatlarla tanış olublar.