"Ekoloji təmiz qara qızıl" adlı toplunun təqdimat mərasimi keçiriləcək
23 oktyabr 2024-cü il tarixində saat 16:00-da bəstəkar Bəhram Nəsibovun neft sənayesi və ekologiya mövzularında yazdığı marş və mahnılardan ibarət "Əsrin müqaviləsi"nin otuz illiyinə və "Yaşıl dünya naminə həmrəylik ili"nə həsr edilmiş "Ekoloji təmiz qara qızıl" toplusunun təqdimat mərasimi keçiriləcək. Bu unikal toplu, bəstəkarın daha əvvəl ifa olunmamış 20 əsərindən ibarət not yazılarını və onların şeir mətnlərini əks etdirir.
QHT.az xəbər verir ki, toplu üç əsas hissədən ibarətdir. Birinci hissə neft sənayesi, ikinci hissə neft kəmərlərinin keçdiyi ərazilər, üçüncü hissə isə ekologiya və alternativ enerji mövzularına həsr edilib. Layihənin rəhbəri və toplunun tərtibçisi "Bəhram Nəsibov yaradıcılığının təbliği" İctimai Birliyinin sədri Adil Nəsibov, baş məsləhətçi və ön sözün müəllifi Milli Məclisin Təbii ehtiyatlar, energetika və ekologiya komitəsinin sədri Sadiq Qurbanovdur.
Tədbirdə bəstəkarın bir neçə əsərinin ifası da gözlənilir. Tədbir "Renever Studio"da, Yasamal Rayon İcra Hakimiyyətinin yanında yerləşən məkanda baş tutacaq. Bu təqdimatın Azərbaycan mədəniyyətinə və dövlətçiliyinə mühüm töhfə verəcəyi gözlənilir.
Tədbirə bütün maraqlananlar dəvətlidir.