Sofi Adeno çərşənbə axşamı amerikalı astronavt Anil Menonla birlikdə Beynəlxalq Kosmik Stansiyadan (BKS) açıq kosmosa çıxaraq bu uğura imza atan ilk fransız qadın astronavt olmağa hazırlaşır.
QHT.az xarici mediaya istinadən bildirir ki, NASA-nın açıqlamasına görə, kosmos yürüşünün Mərkəzi Avropa vaxtı ilə saat 14:35 radələrində başlaması və təxminən 6,5 saat davam etməsi planlaşdırılır. Missiyanın əsas məqsədi isə orbitdəki stansiyada yerləşən kosmos-Yer rabitə antenasını dəyişdirməkdir.
44 yaşlı Sofi Adeno 2022-ci ildə bu əməliyyatı həyata keçirən italiyalı astronavt Samanta Kristoforettidən sonra açıq kosmosa çıxan ikinci avropalı qadın olacaq.
Fransız astronavt son günlər Yer səthindən təxminən 400 kilometr yüksəklikdə yerləşən BKS-də bu əməliyyata hazırlaşır.
Adeno bazar günü X platformasında paylaşım edərək bildirib:
“Uğurlu kosmos yürüşü hava kilidinin qapağı açılmadan xeyli əvvəl başlayır. Son bir neçə gündür bütün diqqətimi məşqlərə, hazırlığa və tam fokuslanmağa yönəltmişəm.”
O əlavə edib ki, dəyişdiriləcək antena BKS ilə Hyustondakı missiya idarəetmə mərkəzi arasında yüksək sürətli rabitə və məlumat ötürülməsi üçün həyati əhəmiyyət daşıyır.
NASA bildirib ki, uçuş mühəndisi Cek Heteuey və stansiyanın komandiri Cessika Meir kosmosa çıxan astronavtları izləyəcək və stansiyanın daxilindən robot qolu idarə edəcəklər.
Əvvəlki kosmos yürüşlərindən birində Meir və Menona dəstək verən Adeno həmin vaxt yazmışdı:
“Kosmosa çıxan astronavtlar diqqət mərkəzində olsalar da, stansiyadan kənar fəaliyyətlər tamamilə komanda işidir və ekipaja stansiyanın daxilindən dəstək vermək hər zaman böyük şərəfdir.”
Təhsili üzrə mühəndis və keçmiş sınaq pilotu olan Adeno bu ilin fevral ayında Klaudi Eynyeredən sonra kosmosa uçan tarixdə ikinci fransız qadın olmuşdu.
Kosmosda açıq yürüş həyata keçirən son fransız isə Beynəlxalq Kosmik Stansiyada iki missiyası zamanı bunu ümumilikdə altı dəfə edən Tomas Peske olmuşdu.
Zəhra Mansırova
