Pan Amerika Səhiyyə Təşkilatı (PAHO), Karib İctimai Səhiyyə Agentliyi (CARPHA) və ABŞ Farmakopeyası (USP) dərmanların keyfiyyətinin yoxlanılması və tənzimləyici sistemlərin gücləndirilməsi məqsədilə regional vebinar keçirib.
QHT.az xarici mediaya istinadən bildirir ki, avqustun 12-də keçirilən tədbirdə Karib hövzəsinin 16 ölkəsindən 84 nümayəndə iştirak edib. Vebinarda əsas diqqət keyfiyyətsiz və saxta dərmanların müəyyənləşdirilməsi, laboratoriya yoxlamalarının gücləndirilməsi və beynəlxalq standartların tətbiqinə yönəlib.
USP mütəxəssisləri dərmanların keyfiyyətinin yoxlanılması üçün istifadə olunan standartlar, analiz metodları və digər resurslar barədə məlumat veriblər. Qayana, Yamayka, Surinam və Trinidad və Tobaqonun laboratoriya nümayəndələri isə bu standartların tətbiqi ilə bağlı təcrübələrini bölüşüblər.
Tədbirdə dərmanların bazara çıxdıqdan sonra da nəzarətdə saxlanmasının vacibliyi vurğulanıb. PAHO, CARPHA və USP laboratoriya şəbəkələrinin, texniki imkanların və mütəxəssis hazırlığının inkişaf etdirilməsi istiqamətində əməkdaşlığı davam etdirmək niyyətlərini bildiriblər.
Təşəbbüsün əsas məqsədi Karib hövzəsi ölkələrində insanların təhlükəsiz, effektiv və keyfiyyəti təsdiqlənmiş dərmanlara çıxışını təmin etməkdir.
