Asiya İnfrastruktur İnvestisiya Bankı (AIIB) 2026-cı ildə dayanıqlı infrastruktur, iqlimə davamlılıq və regional əlaqələrin inkişafına yönəlmiş investisiyalarını artırır.
QHT.az xarici mediaya istinadən bildirir ki, AIIB Cənubi Afrikada ilk investisiyasını həyata keçirərək “South Africa Metro Trading Services” proqramına 500 milyon ABŞ dolları həcmində dövlət zəmanətli kredit ayırıb. Vəsait iqlimə davamlı şəhər infrastrukturunun inkişafına yönəldiləcək.
Bank Türkiyədə İstanbul Şimal Dəmir Yolu Keçidi layihəsi üçün 1,5 milyard ABŞ dollarınadək maliyyələşməni də təsdiqləyib. Layihənin Bosfor üzərindən sərnişin və yük daşımalarını yaxşılaşdırması və daha ekoloji nəqliyyat sisteminin yaradılmasına dəstək verməsi gözlənilir.
Bundan əlavə, AIIB Ficidə iqtisadi dayanıqlığın, iqlim və təbii fəlakətlərə hazırlığın gücləndirilməsi üçün 80 milyon ABŞ dolları ayırıb. Bankın məlumatına görə, çoxtərəfli inkişaf bankları 2025-ci ildə iqlim maliyyələşməsinə ümumilikdə 163 milyard ABŞ dolları ayırıblar.
2026-cı ildə 10 illiyini qeyd edən AIIB 2016-cı ildən etibarən 40 üzv ölkədə 361 layihəni təsdiqləyib və bu layihələrə təxminən 70 milyard ABŞ dolları vəsait ayırıb. Bank hazırda iqlim davamlılığı, regional əlaqələrin inkişafı və özəl kapitalın cəlb edilməsinə xüsusi diqqət yetirir.
