Yay tətili və gec saatlara qədər davam edən əyləncələrdən sonra məktəbə qayıdış üçün həyəcan siqnallarını qurmağın vaxtıdır.
QHT.az xarici mediaya istinadən bildirir ki, yaxşı gecə yuxusu şagirdlərin dərs zamanı diqqətlərini cəmləməsinə və fokuslanmasına kömək edir. Mütəxəssislər yeni dərs ili başlamazdan əvvəl uşaqları tədricən yuxu rejiminə qaytarmağın faydalı olduğunu bildirirlər.
Uşaq Xəstəxanasının pediatrı doktor Gabrina Dixon deyir: “Biz sadəcə ‘yaxşı yatın’ demirik. Bu, həqiqətən də uşaqların öyrənməsinə və gün ərzində fəaliyyətlərini normal şəkildə yerinə yetirməsinə kömək edir”.
Uşaqların ehtiyac duyduğu yuxu müddəti yaşlarından asılı olaraq dəyişir. Məktəbəqədər yaşlı uşaqlar 13 saata qədər yuxuya ehtiyac duyurlar. 10-15 yaş arası uşaqlar üçün 9-12 saat, yeniyetmələr üçün isə 8-10 saat yuxu ən optimal hesab olunur.
Yay aylarında pijama məclisləri, film marafonları və uzun təyyarə səfərləri uşaqların erkən yatmaq rejimini poza bilər. Yenidən rejimə qayıtmaq üçün mütəxəssislər məktəbin ilk günündən bir-iki həftə əvvəl daha erkən yatmaq vaxtı müəyyən etməyi və ya hər gecə yatma vaxtını tədricən 15-30 dəqiqə əvvələ çəkməyi tövsiyə edirlər.
Yatmazdan əvvəl ağır yemək yeməmək və yuxuya getmədən iki saat əvvəl televizor və digər ekranlardan istifadəni dayandırmaq tövsiyə olunur. Bunun əvəzinə duş qəbul etmək və kitab oxumaq kimi rahatladıcı fəaliyyətlərlə sakitləşməyə çalışmaq lazımdır.
Amerika Yuxu Təbabəti Akademiyasının sözçüsü doktor Nitun Verma deyib: “Siz beyninizdəki koqnitiv yükü azaltmağa çalışırsınız. Bu, avtomobil idarə edərkən ayağınızı qaz pedalından yavaş-yavaş çəkməyə bənzəyir”.
Valideynlər uşaqları üçün ən uyğun variantı müəyyənləşdirərək məktəbə qayıdış planlarını buna uyğun tənzimləyə bilərlər. Nikkya Hargrove məktəb başlamazdan əvvəlki həftə əkiz qızlarının yatma vaxtını 30 dəqiqə əvvələ çəkir.
Bəzən uşaqlar kitab oxumaq üçün bir neçə dəqiqə daha gec yatmaqla bağlı razılaşmağa çalışırlar. Hargrove uşaqları böyüdükcə və öz fikirlərini daha çox müdafiə etməyə başladıqca bu cür söhbətlərin vacib olduğunu deyib. O bildirib ki, uşaqlar çox gec saatlara qədər oyaq qalıb səhərlər özlərini yaxşı hiss etməsələr, bu da onlar üçün bir öyrənmə təcrübəsi ola bilər.
Zəhra Mansırova
