QİÇS, vərəm və malyariya ilə mübarizə aparan Qlobal Fond hazırkı icraçı direktor Peter Sandsın yerinə rəhbər seçilməsi üçün namizədlərin adlarını açıqlayıb. Yeni rəhbərin seçilməsi prosesi artıq növbəti mərhələyə keçib.
QHT.az xarici mediaya istinadən bildirir ki, namizədlər arasında daha əvvəl Qlobal Fonda rəhbərlik etmiş və ABŞ prezidentinin QİÇS-lə mübarizə üzrə Fövqəladə Planının (PEPFAR) yaradılmasında iştirak etmiş doktor Mark Dybul, Epidemiyalara Hazırlıq üzrə İnnovasiyalar Koalisiyasının (CEPI) rəhbəri Riçard Hatçett, “Novartis” şirkətinin qlobal səhiyyə üzrə prezidenti Lutz Hegemann, BMT-nin humanitar məsələlər üzrə keçmiş baş katibinin müavini Joyce Msuya və “Save the Children US” təşkilatının prezidenti və baş direktoru Janti Soeripto yer alır.
Namizədlərin seçilməsi 2025-ci ilin sonlarında başlayan və bir neçə ay davam edən proses çərçivəsində həyata keçirilib. Prosesdə beynəlxalq rəhbər kadrların seçilməsi üzrə “Russell Reynolds Associates” şirkəti də iştirak edib. Namizədlərlə bir neçə mərhələdə müsahibələr keçirilib və onların peşəkar göstəriciləri qiymətləndirilib.
Seçimin növbəti mərhələsində namizədlər Qlobal Fondun idarə heyətinin üzvləri ilə görüşəcəklər. Bununla bağlı idarə heyətinin yaxın iki gün ərzində xüsusi toplantı keçirməsi planlaşdırılır.
Bəzi tərəflər rəhbər seçimi prosesinin daha şəffaf aparılmasını tələb edib. Almaniyalı bir deputat bildirib ki, Qlobal Fond donorların, tərəfdaşların və ümumilikdə qlobal səhiyyə ictimaiyyətinin prosesə etimadını təmin etməli və seçimin ədalətli şəkildə keçirilməsinə diqqət yetirməlidir.
