ABŞ-nin xarici yardım sistemində islahatlara ehtiyac olduğu barədə mütəxəssislər arasında ümumi fikir var. Lakin USAID-in fəaliyyətinin dayandırılması və proqramlarının Dövlət Departamentinə keçirilməsi prosesinin necə həyata keçirildiyi ilə bağlı fərqli fikirlər səslənir.
QHT.az xarici mediaya istinadən bildirir ki, məsələ BMT Baş Assambleyasının 81-ci sessiyası çərçivəsində keçirilən Devex tədbirində müzakirə olunub. USAID və Dövlət Departamentinin keçmiş əməkdaşları ABŞ-nin inkişaf yardımının gələcəyini müzakirə ediblər.
ABŞ Qlobal Liderlik Koalisiyasının nümayəndəsi Cim Riçardson keçidin çox qəfil və çətin olduğunu bildirib. Onun sözlərinə görə, sürətli qərarlar strategiya olmadan həyata keçirildikdə problemlər yarada bilər.
Mütəxəssislər ABŞ-nin xarici yardım sistemində uzun müddətdir islahatlara ehtiyac olduğunu, lakin bu prosesin planlı və strateji şəkildə aparılmasının vacibliyini vurğulayıblar.
