ABŞ-nin Meta şirkəti bu ilin sentyabr ayından etibarən özünün hazırladığı yeni süni intellekt çipinin istehsalına başlamağı planlaşdırır. Şirkət eyni zamanda hesablama gücünü artıraraq 2027-ci ilə qədər ümumi hesablama tutumunu 14 giqavata çatdırmağı hədəfləyir.
QHT.az xarici mediaya istinadən bildirir ki, əldə edilən daxili sənədə əsasən, “Iris” kod adlı yeni çip Meta-nın daxildə hazırladığı Meta Training and Inference Accelerators (MTIA) layihəsinin bir hissəsidir. Çip Facebook və Instagram platformalarında istifadə olunan süni intellekt sistemlərinin daha səmərəli işləməsi üçün hazırlanıb. Sınaqlar cəmi altı həftə davam edib və ciddi problem aşkarlanmayıb.
Məlumata görə, Meta çipin hazırlanması üçün Broadcom ilə əməkdaşlıq edir, istehsal isə Taiwan Semiconductor Manufacturing Co. (TSMC) tərəfindən həyata keçiriləcək. Şirkət bununla Nvidia və AMD kimi xarici çip istehsalçılarından asılılığı azaltmağı, eyni zamanda xərcləri aşağı salmağı planlaşdırır.
Daxili sənəddə qeyd olunur ki, Meta bu il ümumilikdə 7 giqavat həcmində hesablama infrastrukturu qurmağı, gələn il isə bu göstəricini iki dəfə artıraraq 14 giqavata çatdırmağı hədəfləyir. Şirkət 2026-cı ildə süni intellekt infrastrukturu üçün 145 milyard dollara qədər vəsait xərcləməyi nəzərdə tutur.
Bu məqsədlə Meta yaddaş çipləri, məlumat saxlama qurğuları və fiber-optik avadanlıqların tədarükü üçün bir neçə iri şirkətlə uzunmüddətli müqavilələr bağlayıb. Süni intellekt texnologiyalarına artan tələbat səbəbindən yaddaş və digər çiplərin qiymətləri son dövrdə əhəmiyyətli dərəcədə yüksəlib.
